Digital service-ah India-a a hmahruaitu nih kan duh – Chief minister

Digital service-ah India-a
a hmahruaitu nih kan duh
– Chief minister
Digital service lamah Mizoram chu India rama hmahruaitu nih an duh a, chutiang tur chuan sawrkarin hma a la mek tih chief minister Lalduhoma chuan a sawi.
Registrar of Cooperative Societies-in an office-a computerisation an kalpui tan chu Thawhlehni khan chief minister hian a hawng a. Mipui tana sawrkar dawr dan awlsam leh rang chu an ngaihlu a, kum hnih chhung lekin chutiang hmalakna chu an nei nual tawh a, hma an chho zel dawn tih a sawi.
“Digital service lama India rama hmahruaitu nih kan duh. Kan state a zim a, mipui kan tlem a, ziak leh chhiar thiam vekna state kan ni a, Sap tawng hria kan tam a, digital service lama a tha ber nih theihna remchang kan neiah kan ngai. Hma pawh kan la nasa a, kum hnih chhung hian online service portal 20 aia tam kan siam tawhin a rinawm,” a ti.
Khaw hrang hranga cooprative society-te tan Cooperation department computerisation hian awlsamna tam tak a thlen dawn a, a thawktute tan pawh awlsamna a pe dawn tih a sawi a ni.
Cooperation minister PC Vanlalruata pawhin he hmalaknaah hian India rama a thawk zo hmasa ber dawttu an ni a, Mizorama a puma office computerise hmasa ber an nih an inring bawk tih a sawi.
Cooperation commissioner & secretary Adit Prakash Rai sawi danin, he project hi Mizoramah 2025 March 29 khan kalpui tan a ni a. RCS office Aizawl bakah district hrang hranga cooperative office a huam a ni.
He project tum ber chu, cooperative society-te tana an hnathawhna kawnga samkhaina siamsak leh a hmuna office dawr kher ngai loa digital-a RCS office leh district cooperative office nen an indawr tawn theihna tur a ni.