Sawrkar hnathawkten dikna tundin a tul hunah chuan “no sir” ti ngam turin chief minister Lalduhoma chuan a chah.
Zonet Cable TV chuan an lo tih tawh thin angin February 16 zan khan Mizoram Civil Services (Combined) Competitive Examination 2023 a tlingte lawmpuina a buatsaih a. Hmanpuitu chief minister chuan officer tling tharte lawmpuina hlanin Pathian tih chunga an hna thawk turin a chah.
Officer inngaitlawmten an chetziain mipui thinlungah thu ropui tak an sawi thin tih a sawi a. Hmun hrang hranga insawnkual a tul foa, chhel tak leh taima taka awm a ngai a, inenkawl fel thin mi nih a pawimawh hle tih a sawi bawk.
“Kan hna hi hna nuam leh awlsam lam a ni vek ngai loa, hun harsa leh khirh tak tak a tam thin hle zawk. Mahni eizawnna lam thawk mumal hman lo khawpa pawl danga inhman vak vak hi a tha lo takzet a. Kawng dik lo chu a zawhtu an tam vang maiin a lo dik ta tihna a ni ngai lo. Chuvangin a hunah chuan ‘no sir’ tih a tul chang a awm thin. Dikna dinpui ngam ula, in dik chuan in huai dawn a ni,” a ti.
Mizoram state chu kum 40 a tling dawn tawh a, state dangah zinchhuak ila, kan lo la hnufum bik zia a chiang thin tih Lalduhoma hian a sawi. “Nang leh kei hi he ram siamtha tura koh kan ni a, politic atanga tih chi a awm a, official atanga tih tur chi a awm bawk. Mahni zawnah theuh kan ram tana kan thawh a tul,” tiin officer tharte chu ram tana an theihna hmang turin a chah.
Dikna tundin hunah “no sir” ti ngam r’u – Lalduhoma
