Dilah nghahrah leh nghasen tha
Luidunga cheng nghahrah leh nghasen chu dilah pawh tha taka thangin an khawsa thei tih Fisheries departrment chuan a finfiah a. Nghaphusen leh Nghabual pawh dilah enchhin leh an tum mek.
Ningania Mizoram Fisheries Technical Service Association (MFTSA) general conference vawi 30-na Aizawla neihah hei hi sawi a ni a. Luidung nungcha humhalh leh hman tangkai kawngah department-in theihtawp chhuahin, Lengpuia Laldenga Fisheries Demonstration Farm-ah nghahrah leh nghasen khawi chhin an ni a. Dilah an thang tha hle tih finfiah a ni. YMA Dapchhuah Branch nen tangdunin a no khawi pun a, nghaphusen, nghabual leh luidung sangha dang pawh tui tir tum mek a ni tih an sawi.
General conference hmanpuitu Fisheries commissioner & secretary H Lalengmawia chuan department thanna atana association hmalakna fakawm a tih thu a sawi a. Sangha dil siamtuten eizawnna tak taka hmang turin rilru dik tak put a ngai tih a sawi. Eizawnna atana hlawhtlin pui tham rilru puttir an ngai, tiin, department thawktute tum mumal leh nghet neia nasa zawka tan la turin a fuih.
Fisheries department hi kum 1972-ah Agriculture department hnuaia wing pakhata ding tan a ni a. 1993 September 13 atangin Agriculture department atanga indangin department puitling a ni ta a ni. Kum 1984 khan MFTSA hi Fisheries department thawkte tan an service chungchang ngaihtuah leh department hmasawnna atan theihtawpa hma la tura din a ni.
Dilah nghahrah leh nghasen tha
