ATL (Aizawl -Thenzawl- Lunglei) kawngpui siamna atana sum, hmun dang kawng siamna atana pawhpen then duh loha he kawngpui dang mektu Lunglei MZP chuan an dan chhunzawm dawn a, Hrangchalkawn lam an dang tel dawn. An lo sawilawk tawh angin MZP Hqrs. Lunglei hian Thawhtanni – April 28 zing dar 7.00 atang khan ATL kawngpui hi an dang tan a. Kawng danna hmunah resolution siamin, “ATL road siamna tur sum vaibelchhia 90.69 atanga pawhpen vbch. 44.89 hi dah let nise, a daih loh chin zawng siamna tur pawh written assurance awm rawh se,” tih an pass.
Hetihlai hian Lunglei district-a ZPM MLA-te leh ZPM Southern Hqrs. Lunglei chuan chief minister Lalduhoma an hmu a. Chief minister hian ATL Road siamna atana sum awm cheng vaibelchhe 90.69 zatve, vbch. 44.89 la bang nia sawi hian kawng siam ngai hmabak chin a daih dawn loh avangin, a daih lo tur inpek ai chuan, tunah Central Road Reasearch Institute (CRRI) chu estimate siam tura tih an ni a. An rawn thawk chhuak mek a, a vaia kawng siamna daih turin estimate siam law law se, a tul ang zat estimate peihfel rualin approve nghal a tiam tih thu dawn a ni.
Hei hi MZP Hqrs. Lunglei lam sawipui an ni a. Sawrkarin tuna sum awm sa dah let emaw CRRI ruaia hmalakna thar neihah duh thlang tura tih an ni. MZP chuan resolution an siam angin, tuna sum awm pawhpen dahlet bakah chumi-in a daih lohna pawh ruahman belh tura written assurance pek an phut tih an sawi a ni.
Hetianga thu an rel avang hian Lunglei Pukpui lam kawngpui dan hi an chhunzawm a. A hmaa an dan tel loh, Serchhip – Hnahthial lamin a pawh Hrangchalkawn pawh an dang tel tawh tih an sawi a ni.
Dinna ngaia dingin Lunglei kawng dan chhunzawm tum
