MNF sawrkar laia hna sang 7 chuang la anga a insawi a dik tawk lo tih Congress party chuan sawiin, direct-a lak tak chu sang 2 chuang chauh a ni tih an sawi.
MPCC Media chairman Remruata Renthlei chuan, MNF sawrkar kum 5 chhunga hna 7983 thalaite hmuhsak anga an inchhal chu a dik tawk lo a. Hna 7983 pek an tihah hian 4437 chu department promotion niin, hna 1394 chu Departmental Exam hmanga hnawhkhah a ni a. Chumi awmzia chu, 2018- 2023 chhungin MNF sawrkar hian direct recruitment-in hna 2218 chauh a la tihna a ni tih a sawi. Mizoram Police-ah ringawt pawh hnaruak 4194 awmin, Covid vanga buaina chhuanlamin Home minister chuan an hnawhkhah theih loh thu a sawi a. Congress sawrkarin a din polytechnic pathum chu an enkawl chhunzawm thei loa, faculty pawh a dah thei lo tih a sawi.
“Tunhnaia Assembly speaker leh Assembly Secretariat lama an hotute chetdanin mipui rilru a ti na in, thalaite a ti beidawng nasa a. MNF sawrkar hnuaiah hian MNF mi leh sa induhsakna a tam zia kan hre theuh a, SEDP hnuaiah zirtirtu 771 an lak pawh MNF mi leh sa vek an ni. Kamrul Laskar leh Zoramchhana te duhsakna bik dawnte chu mipuiin hriat sa a ni,” a ti.
Tun dinhmunah State Employment Exchange Centre pali – Aizawl, Lunglei, Siaha leh Champhaiah awmin, heng zinga Aizawl, Lunglei leh Siaha ah live registration ti thalai hna zawng 40700 an awm mek tih a sawi a. MNF sawrkar hnuaiah thalaite ruihhlo bawihah an tang nasa in ruihhlo a hluar a. Mizorama hna a van luatah thalai tam tak rampawnah chhuakin an theih ang ang hna thawkin chhungkua an chawm a. An hnathawhna hmun hrang hrangah harsatna lian tak tak an tawk fo tih MPCC Media chairman hian a sawi bawk.
“Heng kan sawi tak hi MNF sawrkarna hnuaiah chuan tih vak ngaihna an hre tawh lo niin a lang a. An thil tiamte mumal taka an bawhzui leh thin si loh avangin beiseina pawh nei hleithei loin mipui an siam a. An sawrkar chhunzawm zel chuan kan thalai fel tak tak, an finna leh thiamna Mizoram tan hman theih turte an chhuak bo zel anga, a then ruihhlo bawihah an tang chhunzawm zel anga, kan ram hmabak a thim chho hle dawn,” a ti.
Siamthat hna thawk tur hian Congress party chuan mawhphurhna a la ngam a. Hmabak ko tak ni mah se, rorelna fel tak hnuaiah chuan awmze neiin thalaite harsatna hi chinfel dan tur an hria tih Remruata Renthlei hian sawiin, “Kan sawrkar chuan Young Mizo Entrepreneurship Programme kan din anga, thalaite tan startup funds siamin hna nuaikhat siam tum a ni. Skill development lamah tan lak a ni anga, Congress sawrkar laia din Mizoram Youth Commission pawh tih len leh mumal zawka kalpui a ni dawn,” a ti.
Direct recruitment-a hna lak 2218 chauh – MPCC
