July 11 khan Supreme Court-a three-judge bench chuan November 2021 atang tawha Sanjay Kumar Mishra, Director of the Enforcement Directorate (ED) hun pawhsei sak chu dan kalh tia sawiin Centre chu July 31 hmaa hotu thar ruat turin a ti a. Karhnih hnuah he Bench pangngai vek hian July 27 khan special hearing neiin Mishra chu September 15 thleng’public and national interest’ vangin a hun a pawhseisak leh a, Centre-in October 15 thlenga Mishra hun pawhsei a dilna chu a then lai a remtihsak.
Government of India chuan Mishra hun pawhsei a ngiatnaah ‘thil danglam leh pawimawh tawp vang’ tih chu vauchhera a neih niin hei vang hian anti-graft agency a Mishra pawimawhna chu a thuk viau tihna a ni.
Mishra hi 1984-batch Indian Revenue Service (IRS) officer niin BJP sorkarin a hna a chelh theih nana bureaucrat Ordinance hmanga an chhan hial pahnihna a ni a. A hmasa zawk chu Prime Minister Principal Secretary hlui Nripendra Misra a ni.
Sanjay Kumar Mishra hi October 2018 khan Director of ED-ah thla thum chhung atan ruat a ni a, a hnu lawkah November 2018 khan full-time chief kum hnih chelh tura ruat a ni zui a ni.
November 2020 khan a hun a tawp dawn hnaiah Union government chuan rang takin a pawhsei sak a, a tira kum hnih chu Mishra a pension dawn tawh tih hre reng chungin kum thum chhung atan a pawtsei a, hei tak hi Supreme Court-ah khin zui niin court chuan Mishra hun chu pawhsei sak tawh lo tura a tih hnuah Centre chuan a la duh si avangin a hna a chelhzui theih nan Ordinance a siam ta hial a ni.
Thuneihna sang zawk
Mishra hnuaiah Enforcement Directorate agency chuan thuneihna sang zawk neiin rorel lai Bharatiya Janata Party (BJP) hmelma political party hotu lawkte chu an thlurbing chat chat a, anni mai bakah civil society activists leh sorkar sawiseltute an bitum nasa hle. Senior advocate Prashant Bhusan phei chuan sorkar ‘political henchman’ tia kovin sorkarin Centre lam thlawp lo political party leh leader te bei tura a hman a tihial a ni.
Mishra hnuaiah hian ED chuan Oppositin politician hrang hrang Congress president hlui Rahul Gandhi, Finance Minister hlui P. Chidambaram leh parliamentarian tho a fapa Karti, Jharkhand Chief Minister Hemant Soren, Karnataka Congress chief D.K. Shivakumar, NCP leader Sharad Pawar, Maharashtra Home Minister hlui Anil Deshmukh, AAP Ministers Manish Sisodia leh Satyender Jain, leh Tamil Nadu’s powerful Minister Senthilbalaji te pawh thlur bingin an chhui vak a ni.
Khawng taka agency kaihruaiin leh senior political functionary te hualzimin, minister hlui te leh powerful leader te chu an thlithlai reng a. Kum nga chhung lekin case 4,000 chuang register-in 3,000 searches an kalpui hman hial a ni.
Mak tak maiin ED tena Mishra hnuaia chetlakna an neihah hian politician emaw functionaries BJP te nena inzawmna nei Centre leh State- a mite pawh an khawih ve mang lo.
Mishra chuan ED agency thiltihtheihna leh a huam tipungin kum 2018 a kalpui tan Prevention of Money Laundering Act (PMLA) or the Fugitive Economic Offenders Act leh Fugitive Economic Offenders Act te kalpunaah outside expert leh professional te a chawlut bawk a. Mishra hi a bik takin taxation thil, corruption leh finance lama hriatna thuktak nei tia sawi a ni.
Bureaucrat a nihnaah langsar lo tak ni reng a ni thung a, public meeting emaw political figure te nena lanhona pawh a nei ngai lo va, media-ah a intarlang ngai lo tluk a ni bawk.
“Bureaucrat danglam tak Congress leader hlui Ahmed Patel an UPA sorkar laia thuihruai bera a neih a ni a, tunah chuan a tel lova awm theih loh tluk dinhmunah a ding tawh a. Thuneihna atchilh bureaucrat niin thuneihna neih theih nan chuan eng pawh a ti duh ang,” tiin retired Secretary of the Government of India pakhat chuan a sawi.
Bureaucrat dang Pranab Mukherjee Finance Minister a nih laia Finance Ministry a thawk chuan Mishra chu Revenue Secretary ai pawhin thil a ti thei zawk tiin a sawi.