Kuminah African Swine Fever (ASF) a leng a, tun hnaiah he hri awmna hmun hi a pung, district pali-ah a leng tih a ni char char a, tunah chuan district panga-ah hmuh a ni ta.
AH&Vety department-in ni tina ASF vanga vawk thi zat an chhinchhiahnaa a lan danin, July ni 5 thleng kha chuan Mamit, Lunglei, Lawngtlai leh Siaha district-ahte hi ASF hi a leng a, July ni 6-a an report-ah Khawzawl district a lang thar. July ni 6 atangin Mizoram district pangaah hri a leng ta a ni.
ASF finfiahna hnuhnung ber Khawzawl district-ah hian July 6-ah hian vawk 38 a thi a, July ni 10 thleng khan ASF vanga vawk thi hi a la awm ziah.
Tun hnaiah Khawzawl district atangin Aizawlah vawk phurh a awm a, AH&Vety department-in an lo endik hman thin. Thawhlehni zana an endikah chuan ASF hri vei vawk chu thawn kir a ni a, a hnuah pawh department-in a vaiin an lo endik leh.
Kumina ASF hrileng hi a nasa rih lo a, department lam chuan kum hmasate ngaihtuahin a nasa lo a, a darh chak lo, an ti.
June leh July hi a nasat hun a ni thin a, thla liam taah khan kum hmasa June te nena khaikhinin a nasa lo. July-ah pawh a nasa rih lo.
Kumina ASF finfiahna hmasa Mamit district-ah a zia tawh a, Khawzawl district tih lohva finfiahna hnuhnung Lunglei district pawh an zia.
AH&Vety department chhinchhiah danin, kuminah March ni 20-ah ASF hriat tan a ni a, July ni 10 thleng khan vawk 5389 a thi tawh a, vawk 1800 tihhlum/suat a ni tawh bawk.
District dangah ASF finfiah
