District Development Board din rawt
Mizoram Legislative Assembly-in VC dan thar a pass tawh bawhzuina atan thuneihna semzaina atan district tinah ‘District Development Committee (DDC) /Board’ din turin Mizoram Transformation Movement chuan state sawrkar a ngen.
Mizoram Transformation Movement buatsaihin September 25 zan khan Mizoram hmasawnna atan “Thuneihna Insemzai” zirho a ni a. Resource person-ah Prof J Doungel hman niin, heti lam ngaihventute bakah MZU research scholars leh zirlai 60 chuang an tel.
Panchayati Raj institution kalphung, India danpuiin a lo siam tawh, thuneihna insem zai zulzuiin hman ve a nih theih dan zir leh sawiho a ni a. Panchayati Raj tih hming hi Mizo rilruah a tlak nat loh avangin hemi zulzui tho hian village council chu Mizoramah kalpui a ni. State Assembly-in Village Council Act 2025 a pass tawh chu hman thuai theih a chakawm tih sawi niin, hman a nih chuan VC-te thuneihna a sang lehzual dawn a, khawtin hmasawnna atan thil tha tak, thuneihna semzaina a ni dawn tih sawi a ni.
Mizoram-in thuneihna semzaina kawnga hmabak pawimawh chu, district tina ‘District Development Committee (DDC) /Board’ din a ni tih sawi a ni a. State danga ‘Zilla Parishad’ an tih aiah ‘DDC /Board’ hming hi vuah theih a ni, tiin, ‘Hetianga district tinin mahni district hmasawnna tur a rel theih hunah chuan mipui kutah hmasawnna a awm lehzualin a chak zawk dawn a. Hemi atan hian central atang pawhin funding hranpa rawn kal theih dan a awm dawn,’ tih a ni.
Mipui kutah thuneihna tam zawk a awm theihnan MTM chuan DDC /Board hi Panchayati Raj institution kalphung zuiin siam theih nise tha a ti tih sawiin, hetiang titheitu Mizoram sawrkar pawh hma la turin an ngen tih an sawi.
District Development Board din rawt
