District headquarter fai ber Saitual
Urban town zinga fai ber Phullen
UD&PA department ‘Swachh Bharat Mission (Urban)’ hnuaia kum 2017 atanga kumtina buatsaih thin Mizoram Khawpui Fai Inelna 2024 lawmman chu Pathiannia Aizawla Republic Day lawmnaah larsap Gen. Vijay Kumar Singh (Retd) chuan a sem.
Khawpui Fai Inelnaah hian Mizorama notified town 28-te faina leh thianghlimna kawngh an inel a, kuminah hian Mizoram khawpui category-IA ah Aizawl Municipal huamchhunga local council 85 inelin, category-IB ah Lunglei Municipal huamchhunga local council 24 an inel. Category-II (district headquarters) ah Aizawl leh Lunglei tiam lohin district headquarters 9 inelin, category-III (urban town) ah khaw 17 an inel a ni. Tun tumah hian category-II & III lawmman sem hmasak niin, local council inelna (category IA leh IB) hi kumin March-a sem tum a ni. Khawpui fai Inelna endik tur hian sawrkarin panel of judges a ruat a, 2024 December chhung khan endik a ni.
Lawmman hian certificate leh sumfai a keng a. Pakhatna Rs. 100,000; pahnihna Rs. 80000, pathumna Rs. 50000 a ni.
Mizoram Khawpui Fai Inelna hi faina leh thianghlimna kawnga inelna thianghlim an neih theihnana buatsaih a nih bakah kumtina Ministry of Housing & Urban Affairs-in a kalpui thin, India ram khawpui fai endikna – Swachh Survekshan atana Mizoram khawpui inbuatsaih lawk theihna tura duan a ni.
Khawpuiten faina leh thianghlimna kawngah hma an sawn tawh tlangpui avangin endikna tehfung pawh kumtinin a huamzau zawka herrem hret hret thin a ni a. Lang theia an fai piahlamah 2023- 2024 chhunga an hmalaknaah endik an ni. Bawlhhlawh thliarhran leh sawngbawl kawnga hma la tha, hman khat daih – single use plastic tihrem kawnga hmalakna tha, faina kawnga sawrkar department hrang hrang, NGO hrang hrang leh mipui thawhhona tha endik tel a ni. Hei bakah hian environment humhim kawnga sawrkar, khawtlang leh mimal anga hmalakna pawh tehfung lian tak a ni. Khawpui Fai Inelna 2025 hi April 2025-a tan leh tura inbuatsaih a ni.