Health & Family Welfare minister Lalrinpuii chuan kar kalta khan Khawzawl District Hospital leh Champhai District Hospital a tlawh a. A hmunhma fangkualin, thawktute nen an inkawm.
Aizawl atanga Champhai lam pana a kalnaah October 4 tlai khan Khawzawl District Hospital a tlawh a. Hospital building thar sakna tur hmun enpuiin, a sak dan tur a zawtfiah a. Hospital fangin TrueNat laboratory leh Cold Chainroom a enfiah bakah hospital ward-a damlo awmte tlawhin a kawm a ni. Hospital fan zawh hian thawktute nen an thukhawm a, hospital-a thawkten an mamawh leh harsatna an lo thlen.
Minister chuan hospital-a doctor, nurse leh thawktu dangten hna tha taka an thawh avangin lawmthu a hrilh a, an mamawh dan ang zela tanpuina pek ngei a tum thu a sawi a ni.
Inrinni khan Champhai District Hospital, AYUSH building, GNM Nursing School, chief medical officer (CMO) office a tlawh a. Health minister chuan Mizoram sawrkarin thawktu indaih lohna phuhru turin theihtawp a chhuah mek tih a sawi a. Chief minister hmalaknain Pediatrics Intensive Care Unit (PICU) a thawk mek nurse 36 leh anmahni puitu mi 19, kumin September-a an thawh hun tawp turte thawk chhunzawm zel tura tih an nih thu te; health worker 51, pharmacist 17, nurse (contract) 40 bakah drugs inspector leh dialysis technician la tura phalna an neih tawh thu te; Champhai damdawi in mamawh orthopaedic surgeon pawh National Health Mission hnuaia la turin hma an lak mek thu te a sawi a ni.
District Hospital, CMO, AYUSH leh Nursing School hotuten an mamawh an lo thlen chu a theih anga hma lakpui a tum tih a hrilh.
Tourism minister ni bawk Lalrinpuii hian Champhai Vengsang, Agriculture Rest House hmun hlui muala Convention Center sak tumna hmun a tlawh a. Convention Center hi Swadesh Darshan 2.0 hnuaiah sak tum niin, chak taka hma lak mek a ni.
District Hospital pahnih tlawh
