Site icon The Aizawl Post

Division league tan a ni ta

Mizoram Basketball Association (MBBA) hnuaia league sang ber dawttu, Division League (D-League) Screening inelna chu January ni 28, 2025 khan khelh tan a ni.
Mizoram ah hian Basketball inelna san dan hetiang hian division 5 a inchherchhuan – Mizoram Super League (MSL). D – League, Division 1, Division 2 leh Division 3.
D League-ah hian team pasarih (7) awmin a tawpa point hmu sang pathum (3) ten MSL hi an lut dawn a ni. Tin, tumah hian Saitual BC erawh an inlan thei lo.
Tarlan tak angin MSL khel turin point hmu sang Club pathum tan hmunawl a awm a. He screening tournament-ah hian team tin tan Interstate player pakhat leh foreign player pakhat neih phal a nih bawk avangin league bul tan tirh atangin match hmuhnawm fâl a awm nghal.
Tunhnaia tualchhung inelna lama thawm nei lian tak, Chhinga veng BC hian Interstate player Shubam Shiva, UP state atangin an chah chhuak a, team kaihruai turin coach atan MSL a champion ngun ber Dawrpui tlangval Lalruatfela (Afela) an nei cheu bawk a, ani ho hian MSL an kai theih ngei a rinawm. Tualchhung tlangval Peka leh Valtea bakah chakpui tham player thahrui nei tha zet Hriata an kawl a, Durtlang Duo Faka leh Mafela hi Zarkawt BCA atangin an la lut cheu nen, he team hi an tlo viau ang.
Chutih rualin, tumhnih MSL semi finalist Mission veng Hotshots hian UP atangin player Abhisek Giri an lak luh bakah tualchhung coach nomawiin a zui theih bik riau Khatla pa, Vanlalnunsanga Ralte (Lana) hovin hun harsa tak karah Bethlehem Vengthlang BC chu an game hmasa berah point khatin an hneh – inrintawkna nen an khelh zui a rinawm.
Tarlan hmaih thiang lo, LB Associates Bungkawn hi MSL ah pawh team tha pawl ni pha thin kha an nia, D League ah hian châm rei an tum hauh lovang. Tuikual South BC hian lang lo lama team phuarkhawmtu an Club hruaitu tha Robs Tlau hovin an inbuatsaihna a tha hle. Anni hian Ameirican player, Matthew Brown neiin Sr. Team enkawl lama tawnhriat la nei lem lo coach Lalrintluanga ho hian Phengphehlep iangin thlawk thei dawn tak maw?
Team hlun OPD Venghlui hiam Punjab atangin Arshdeep Singh la lutin, team inrualkhai tak an ni a, Armed veng player tawnhriat ngah Rinpuia te hian MSL inben kai mgei an tumruh hle. Team pan zawk anga lang Nursery BC leh Bethlehem BC hi an squad enin team tlo tak an ni kher lo maithei; an game hmasa berah chak lo ve ve mah se, team tha zawk anga langte lakah zuam sual an awl theih zia an phochhuak nghal pang thung!
D League Club -Bethlehem BC, Chhinga veng BC, LB Associates Bungkawn BC, Nursery BC, OPD Venghlui, Tuikual South BC, VR 4 zingah hian MSL, 2026 khel pha tur chuan tawiawmtu (fans) nei tha an pawimawh viau ang.
Ziaktu :|pa Bunghai

Exit mobile version