Diwali lawmin Delhi leh a chhehvel boruak tibawlhhlawh nasa

Diwali lawmin Delhi leh a chhehvel boruak tibawlhhlawh nasa
Thawhtannia Hindu-te sakhaw kûtpui ber, Diwali hman chuan ram khawpui ber, Delhi boruak a tidanglam nasa hle a, a thlithlaina hmun (station) 38 awma 34-ah chuan boruak bawlhhlawh dan hi ‘red zone’ a kai vek a, ‘chhe tak’ atangin ‘hlauhawm’ a kai zui ngei rin a ni.
Delhi-ah hian darkar 24 chhunga air quality index (AQI) chawhrual, Thawhtanni tlai dar 04:00-a tihchhuahah chuan 345 niin ‘chhe tak’ huangah a awm a, Pathianni nilenga 326 aiin a sang/bawlhhlawh zawk a ni.
Central Pollution Control Board (CPCB)-in SAMEER app an siamah chuan monitoring station paliah ‘hlauhawm’ a kai tawh a. Heng hmuna AQI hi 400 chung lam vek niin Dwarka (417), Ashok Vihar (404), Wazirpur (423) leh Anand Vihar (404) te an ni.
Monitoring station 30 velah ‘chhe tak’ dinhmun thlengin AQI chu 300 chhung lam vek an ni.
Thawhtanni chawhnu khan station 38 zinga 31-ah ‘chhe tak’ dinhmun kaiin station pathum huam chhungah ‘hlauhawm’ a kai bawk tih a lang.
Boruak bawlhhlawh hian zual lam pan zuiin Nilaini thleng hian ‘hlauhawm’ huangah awm turah mi thiamte chuan an ngai.
CPCB hian AQI 0 leh 50 inkar ‘tha’, 51 leh 100 inkar ‘la awm theih’, 101 leh 200 inkar ‘la pangngai’, 201 leh 300 inkar ‘chhia’, 301 leh 400 inkar ‘chhe tak’ leh 401 leh 500 inkar ‘hlauhawm’ tiin a then.
Thawhtanni bikah khan lirtheia veivahna khuin chu Delhi tibawlhhlawhtu zinga 15.6% a tling a, industry leh thil dangten 23.3% an hauh bawk niin Decision Support System (DSS) chuan a tar lang.
Pathianni khan Commission for Air Quality Management (CAQM) chuan Delhi-NCR huam chhunga boruak bawlhhlawh zel tur ven nan Graded Response Action Plan (GRAP) Stage II a lo kalpui tan tawh.
Inrinni khan India Meteorological Department (IMD) leh Indian Institute of Tropical Meteorology (IITM) chhut lawkna thuin Sub-committee on GRAP hi thukhawmin GRAP II hi kalpui tulin an hria a ni.
October 15 khan Supreme Court chuan Delhi-NCR huam chhungah hian Diwali hma niah halmawi hal leh hralh zing dar 06:00 atanga zan dar 07:00 inkarah phalin a ni takah erawh zan dar 08:00 leh dar 10:00 inkar chauh a phal thung.