French Open 2024 khelh mekah thawhlehni khan champion lai Novak Djokovic a inlan a, tualchhung tlangval Pierre-Hugues Herbert lakah harsatna tawk lovin a chak nghal. Djokovic rual hian 2023 finalist Casper Rudd a chak bawk.
World No. 1 ni lai leh Grand Slam-a vawi 24 zet champion tawh Novak Djokovic hian kum2024 a hmang tha lo viau a, inelna hrang hrang a hmachhawn tawhah demi-final a la paltlang miah lo. A ropuina hmun Australian Open-ah final lut zo lovin a tla a, inelna a hmachhawn hnuhnung ber Geneva Open-ah semi-final pal tlang zo lovin a tla leh ringawt bawk. Kum a hman that loh em vangin French Open a hmachhawn tur hian ngaihven a hlawh a, a lakah rinhlelhna a lian viau bawk. Beiseina sang vut nen inlan lem lo mah se bul a tan tha a, Pierre-Hugues Herbert lakah set hloh lovin a chak.
Champion lai Djokovic hian set khatnaah break a neih a chhawr tangkai a, game li hloh chungin set a la. Set hnihnaah Herbert nen an inhnehtawk viau a, game an inlak chhawk zak zak hnuin tie-break khelh a ni. Tie-break-ah tawnhriat ngah zawk Djokovic a chungnung a. Set thumnaah game li hloh chunga set a lak leh hnuin 6-4 7-6 (7-3) 6-4 in a chak a, second round a lut ta a ni.
Champion lai Djokovic hian a trophy kawl mek humhim tumin tan a khawh zui dawn a. A vawi li nan Rolland Garros-ah a champion thei a nih chuan mipa lamah Grand Slam a champion ngun ber a nihna chu trophy pathum ngawtin a tihzau belh dawn a. Grand Slam-ah vawi 25 a champion thei a nih chuan mipa leh hmeichhe lamah Grand Slam a champion ngun ber a ni nghal dawn bawk. Hmeichhe lamah champion ngun ber Margaret Court leh Djokovic te hi Grand Slam ah vawi 24 ve ve an champion dun mek a ni.
Thawhlehni a inkhel dangah 2023 final-ah Djokovic hneh lova tlawm Casper Ruud pawhin hnehna a chang a, a khingpui Felipe Meligeni Alves lakah set hloh lova hnehna changin, second round a lut.
Seventh seed Ruud hian World No. 137 naa awm mek Felipe Meligeni Alves lakah 6-3 6-4 6-3 in hnehna a chang a, harsatna a tawk lo. Ruud hi French Open final-ah kum 2022 leh 2023 khan a lo vanduai tawh a. 2024-ah champion ngei tawh tumin tan a khawh ang.
Djokovic a chak nghal
![](https://theaizawlpost.org/wp-content/uploads/Clipboard01-1165.jpg)