Inrinni zan khan Paris Masters semi-final khelh a ni a, set khatna a hloh zet hnuin Novak Djokovic chuan a khingpui Andrey Rublev a hneh a, Grigor Dimitrov hmachhawn turin final a lut.
Paris Masters-ah vawi ruk champion tawh a, semi-final-a la tlawm ngai lo Djokovic hian Rublev lakah beisei angin a khel tha lova, a tlawm a rinawm hman hial. Set khatnaah game an inlak chhawk zak zak a, Rublev-a’n 6-5 a hma a hruai laiin Serb hian a serve a hum zo lo. A serve a hum zawh loh vangin set khatna a hloh phawt.
Set hnihnaah pawh an inhnehtawk zui viau a, game an inlak chhawk leh zak zak. Break theihna hun remchang nei bawk mah se Djokovic-a’n a chhawr tangkai thei bik lova, tiebreak khelh a ngai. Tiebreak a chetha thin Djokovic-a’n a ze ngai a chhuah a, harsa lo takin set a la. Set khat ve ve an lak hnuin deciding set hmuhnawm takah an khel chhunzawm. Final lut tur zawk tihchianna set-ah game an inlakchhawk leh zak zak. Serb hian 6-5 in hma an hruai laiin break pawimawh zet mai a nei a, tiebreak khelh ngai lovin set la zui leh. Tlak hlauhawm dinhmuna a din zet hnuin 5-7, 7-6 (7-3), 7-5 a hnehna changin final a lut ta a ni.
Paris Masters-ah vawi ruk champion a, champion ngun ber ni mek Djokovic hian final-ah Stefanos Tsitsipas hnehtu Grigor Dimitrov a hmachhawn zui leh. Bulgarian Dimitrov hian semi-final-a a khingpui Tsitsipas hi 6-3 6-7 (1-7) 7-6 (7-3) in a hneh a, final a lut. Final hi Pathianni zan khan khelh a ni a, result kan tarlang hman lo.
Djokovic-a’n Rublev a lehthal
