Djokovic barakhaihtu Musetti
Monte Carlo Masters khel mekah Ningani khan Italian Lorenzo Musetti chuan mipa singles third round inkhel pakhatah 4-6, 7-5, 6-4-in world number one Novak Djokovic a hneh nawlh a, Serb hian a record kawl lai belhchhaha Masters trophy 39 lak tlin a tumna a puitlin zo ta rih lo phawt.
Ningani hmaa clay leilung bika Djokovic leh Musetti inhmachhawn hnuhnun ber chu kum 2021 Roland Garros match pui tak kha niin, tah pawh khan set hnih zeta a hnufual hnuah Serb khan hnehna a changlet thei hram a, tuntum erawh Monte Carlo thli thaw karah Musetti zawkin ‘comeback’ hnehna a chang ve thung.
Kum 21 mi lek ni chunga World No. 1 hneh thei Musetti chuan hnehna a chan hnuah tap lo hram turin a insehruh nasa tih a sawi a, thli avanga khelh har tak hnuaiah match rei tak an khelh thu sawiin, thli a thaw ni satliah mai loin a vawt tel tih a sawi a; tharuma inbeihna tak tak a nih thu leh match hautak a nihzia sawi chungin a hnehna chan avangin a inchhuang larh tih a tarlang a, a tan chuan Novak ngei mai hneh kha chhinchhiahtlak a nih thu a sawilang tel bawk.
Italian hian Hubert Hurkacz hnehtu a chipui Jannik Sinner lakah fiahna dang a hmachhawn zui leh ang.
Seventh seed Sinner hian Ningani inkhel dangah sprint great Usain Bolt-a hmuh laiin Hurkacz lakah 3-6, 7-6(6), 6-1 hnehna a sualchhuak.
Daniil Medvedev pawhin Alexander Zverev hnehin quarter-final a lut ve bawk.
Russian Medvedev hian season kal laia a chetthat chhunzawmin a elpui kumhlun nena tum 14 an intawnnaah 3-6, 7-5, 7-6(7) hnehna a chang.
Thla khat liamta Indian Wells last 16 lamah pawh Medvedev hian German Zverev hneh tawh bawkin, kumin bika hardcourt title pali la tawh hian clay leilunga trophy a beisei zui lehna kawngah last eight a lut leh nghal.
Ti hian, kumin bikah kum 27 mi Daniil Medvedev hi match 31 tehreng a chak tling tawh.
Defending champion Stefanos Tsitsipas pawh a la tlo zel a, minute 90 lek chhungin Nicolas Jarry lakah 6-3, 6-4 hnehna awlsam changin, he tournament bikah hian nikum lam nen chhiar zawmin match 12 a chak zawn tling ta.
Russian Andrey Rublev pawhin a chipui Karen Khachanov lakah 7-6(4), 6-2 hnehna chang, American Taylor Fritz pawhin set thum an inkhelh hnuah Jiri Lehecka a vaw tla ve bawk.
German qualifier Jan-Lennard Struff chuan fourth seed Casper Ruud lakah awihawm loh takin 6-1, 7-6(6) hnehna a sualchhuak nawlh thung a, ti hian, clay leilung bika match kaw chhung chak zawn tling tawh Estoril champion Ruud hian nikum July thla hnu lama a vawikhatna atan clay-ah ngam loh a tawng ve ta a ni.
Italian Matteo Berrettini erawh a dulthuar a tihnat avangin sixth seed Holger Rune nen rei an inchai hman lo tihah a inhnukdawk a, Danish rawlthar hian hahdam zawkin ‘last eight’ a luh theih phah.
Djokovic barakhaihtu Musetti
![](https://theaizawlpost.org/wp-content/uploads/2023/04/ddd.jpg)