Mizoram sawrkar hnuaia thawk tur medical doctor indaih lohna a nasa a, post 101 hnawhkhah loh a awm mek. Hetihlai hian doctor thenkhatin awm duhna leh duh lohna an nei chu an buaina pakhat a ni tih Health minister Lalrinpuii chuan a sawi.
Ningania Assembly Session-ah member hrang hrangin an biala doctor awm lo leh indaih lo chungchang an sawi a. Doctor dahsak turin Health minister hi an ngen a ni.
East Tuipui bialtu MLA Ramthanmawia chuan a bial Sesih Primary Health Centre chu kum 34 kaltaa khatihlaia Health minister Pu Vaivenga’n a hawn hnu ah doctor hmel a hmu ta lo vang vang a. Kum 2020 ah sawrkarin doctor a pe a, ramri bul a ni nen an hmang tangkai hle a, sawrkar a inthlak hnu lawkah Tuipangah sawn sak nghal a ni tih a sawi. A aiawh tura sawrkarin a dah chu awm duh loin sawrkar atanga banna a thehlut tih an hre leh zel tih a sawi bawk.
Health minister chuan Sesih PHC-a doctor sawn hmunruak luah tur hian doctor an pe nghal a, mahse doctor thenkhatin awm duhna leh awm duh lohna an nei a. Thla thum lo awm lawk a, Zoram Medical College-a zirlaite an zirchhuah veleha thlak leh tura an ti chung pawhin duhloin a bansan a, pek leh tur an ngaihtuah mek tih a sawi. Sesiha doctor awm sa chu Tuipang lamah administration thil avangin dah a ngaih tlat avanga sawnchhuak an ni tih a sawi a ni.
“Doctor lak tur an vang a, a then thiamna sang zawk nei turin an zir leh bawk nen. ZMC-a zirlaite kumin April thla tawpah an zir zo dawn a, kan innghahna ber an ni. Chumi hnu chuan sawrkarin doctor awm lohna damdawi inah dah dan ngaihtuah kan tum,” a ti.
Doctor association lam sawi danin, doctor hna ruak hnawhkhah loh post 101 a awm a, nurse post ruak hnawhkhah loh 143, health worker post ruak hnawhkhah loh 412 a awm a. Pharmacist, laboratory technician, x-ray technician ah pawh post hnawhkhah loh a tam tih Lalrinpuii hian a sawi a. Finance changtu chief minister hnenah hei hi a thlen tawh a, a ni thurawn angin a tahtawla tih chhoh zel tum a ni a, nurse post ruak hnawhkhahna tur an dil tih a sawi.
Health minister sawi danin, PHC-a medical officer (doctor) awm lohna 15 a awm a; MPSC kaltlangin specialist 7 leh medical officer 9 lak tum a ni a. Specialist lak tur hi buaipui mek niin, MO pawh tih theih thuai an beisei.
Doctor post 100 vel a ruak Awm duhlohna nei an awm
