Document lem hmanga Mizoram sawrkar hnuaia ha doctor hna thawk tawh chu police-in an man.
Thudawn danin, document lem hmanga dental surgeon hna thawka puh Christina Lalthazuali hi August 18 khan police-in manin a thubuai ngaihtuah chhungin court remtihna in Central Women Jail-a awm tura dahluh a ni.
Document lem hmanga sawrkar hnuaia dental surgeon hna thawk an awm nia sawi chungchangah hian Health department chuan FIR a lo thehlut tawh a; he doctor lem hian court-ah anticipatory bail a dil a, court-in a dilna hi hnawlsakin, tunhnaiah a hriselna that loh chhuanlamin damdawi ina dah a ni. Damdawi in atanga a chhuah hnu ah police-te hian FIR bawhzuiin thu zawhfiah turin an la a, court-ah kalpui niin, court remtihna in a case chhui chhung jail-a dah lailawk a ni.
Regional Institute of Medical Science (RIMS) Imphal atanga Bachelor of Dental Surgery zirchhuak nia certificate nei Christina Lalthazuali hian document lam hmangin dental surgeon hna a thawk niin Mizo Zirlai Pawl chuan an sawi a, sawrkarah an thlen zui a ni. MZP ngenna angin Health department chuan he thil hi an chhuichiang a, hetihlai hian Christina Lalthazuali hian amah chhawrtu National Health Mission ah banna a thehlut a, NHM hian a lo pawmsak nghal a ni.
Document lema hmanga doctor hna thawk an man
