Donald Trump chuan November thlaa US President thlanna neih tur chu US history a ‘ni pawimawh ber’ tia sawiin White House luah tuma a campaign na chu US tana hun pawimawh tiin a sawi.
Republican nominee a nih chian hnuah president hlui chuan thlantlina nih loh chuan thisen a luang ang a ti bawk a, mahse a sawi chiang zui duh lo thung a, a thusawi hi US auto industry in harsatna nasa tak a tawh mek chungchang vang nia ngaihtheih a ni thung.
“A ni hre reng rawh u, November 5 a ni a. Kan ram tana ni pawimawh ber ni turah ka ngai a ni” tiin kum 77 a upa chuan Vandalia, Ohio a rally a neihnaah a sawi a. A tumpui tur Joe Biden chu president ni tawh zinga chhe ber a ti bawk.
Chinese te chuan mexico ah car siamna dinin chu chu Americans te hnenah hralh an tum a ni a ti bawk a. “Thlan tlin a nih chuan chung car te chu America-ah an hralh thei dawn lo” tiin a sawi bawk.
“Thlan tlin a nih loh chuan thisen a luang ang a, ram tan thisen a luang ang. Mahse, chung car te chu an hralh thei dawn chuang lo” tiin a sawi bawk.
Trump thusawi chu social media ah chhut zui nasat niin Biden campaign te chuan thuchhuah siamin Trump chu ‘loser’ ti ve thungin politics thila tharum thawhna hmatheh an ti bawk a.
“January 6 ang kha thleng leh se a duh a, mahse American mipui ten November thlaah an duh loh zia an lan tir leh dawn a, a firfiakna, tharum a ngainatna leh phuba lak a chakna te chu an hnawl a ni” tiin kum 2021 a US Capitol Trump thlawptu tena an suasam chu behchhana hmangin an sawi bawk.
Tun thla tir lam khan Trump leh Biden te chuan an party nomination hmu turin delegates mamawh tawk an nei ve ve a, kumin November thlaah inthlanna neih turah an inkhing leh dawn a ni.
Trump an camapign auhla ber pakhata a neih chu immigration policy niin Biden a ‘horror show’ a tihsak bawk a, Republicans te chu Congress ah Biden bill te chu dodal tura ngenin border security measures chu a khauh thei ang bera kalpui a ngai a ti bawk.
Trump chuan Biden hian Hispanic Americans immigrants million tel te work permit pe in African-American te chu an hnungah a vit a ni tiin a sawi a, African-American te chu Biden policy avanga tuar ber tute an ni a ti bawk.
Hetihlai hian Trump a vice president thin Mike Pence chuan a boss hlui chu White House luah leh turin a duhloh thu sawiin a thlawp loh tur thu a sawi thung.
US President Joe Biden chuan amah leh Donald Trump te kum upatna chu annual media dinner neihnaah fiamthu thawh nana hmangin chumi hnuah Trump chu natakin a bei zui thung.
“Candidate pakhat zawk hi a upa lutuk mah maha president ni turin mentally in a fit lo” tiin kum 81 a upa Democrat chuan a sawi a, ‘midang pakhat zawk chu keimah ka ni’ tiin a sawi.
US voter tena Democrats president nilai mek Joe Biden kum chu upa an tih mah mah tawh avangin poll lak hrang hrangah Republican candidate nominee Donald Trump chu a um zawk tu ah a tang mek thung a ni.
Donald Trump leh Biden inbei zel
