Tunhnaia DP&AR changtu nihna inchhuhsak dan khan ZPM sawrkarah mipui sawrkar, ram rorelna tha beisei chi a nih loh zia a tichiang tih Congress hruaitu Lalnunmawia Chuaungo chuan a sawi.
MPCC senior vice president Lalnunmawia Chuaungo hian Inrinni khan Khawzawl leh Serchhip district khaw thenkhat a tlawh a. ZPM chief minister chuan portfolio a nei ve dawn lo, tia inzuarte khan tunah chuan dan humhim a, dan anga kal duh Pu K Sapdanga department chan DP&AR chu mi tute emaw tana kawng sialsak duhna vangin chief minister chanpual atan chhuhsak a ni a. Hei hian mipui sawrkar, ram rorelna tha he sawrkara beisei chi a nih lohzia a tichiang tih a sawi.
Mizoram hmun tinah sum leh pai harsatna a thleng nasa a. Mipui sum chu mi tlemte kutah awmin, mi tlemte in an chawm a, an hawp bawk tiin a sawi a. Sum leh pai harsatna hian rukruk, tualthah, in rawk, ruangchhar, ruihhlo tawlh a ti hluar nasa a. Synod Prison Ministry-in kum 2025 chhunga Mizoram jail hrang hrang a zirchiannaah jail tang zaa 68.4 chu retheihna leh harsatna vanga thleng a ni, tiin, hei hi sawrkar sum enkawl thiam lo kan neih vang a ni tih a sawi.
Central-ah BJP leadership a buai hle a. BJP danah kum 75 pel tawh chuan politics chawlh san tur, tih a nih lain Narendra Modi chu kum 75 pel tawh, tun term a zawha chawl tur a ni a. Amah thlaktu turah nasa takin tun atangin party chhung a buai tih MPCC hruaitu hian sawiin, central-ah Congress tan kawl a eng tih a sawi a ni.
Thingtlang hmun tam taka damdawi ina doctor indaih loh avanga harsatna thleng thin, sutkian chhoh mek a nih chhan chu Congress sawrkarin Mizoram ngeiah doctor zirna a lo buatsaih vang a ni tih a sawi a. Hei aia changtlung hian Congress chuan an thuam tha dawn a, zirna school pawh India rama zirna tha, tia hriat hlawh khawpa siam turin ruahmanna an siam tih a sawi bawk.
“Congress party chuan mitin fairel thleng phak sawrkar a siam dawn a. NLUP changtlung zawk kalpui turin ruahmanna a siam a ni. Heng atan hian kuthnathawktute tan dawhkan atanga ruahmanna siam loin a hmunah ngei tlawhchhuah an ni a. An mamawh ang leh an harsatna sukianga tihmasawn turin ruahmanna rintlak leh belh fakawm kan siam mek,” MPCC senior vice president hian a ti.
Chawngtlai, Tualte, Chalrang, Khawhai, Sialhawk, Biate, East Lungdar, Mualcheng leh Khawlailung khua tlawhin Congress party mite bakah heng khuaa lakhuihthei, sapthei leh tomato chingtu kuthnathawktute nen an inkawm a ni..
DP&AR inchhuhsak dan kha ram rorelna tha zia a ni lo tih a chiang – Lalnunmawia Chuaungo
