DR Congo-a Ebola leng vangin mi 100 vel thi tawh

DR Congo-a Ebola leng vangin mi 100 vel thi tawh
Democratic Republic of Congo-a Ebola leng vangin mi 100 velin an thi tawh a, mi 390 chuangin an kai tawh bawk nia an hriat thu Africa Centers for Disease Control and Prevention hotuin BBC a hrilh.
World Health Organization (WHO) chuan hri leng hi international emergency-ah a puang.
Tuna Ebola leng mek hi Bundibugyo virus vang a ni a, damdawi leh vaccine a la awm lo.
Uganda-ah pawh a kai hmuh pahnih leh thihpui pakhat an awm bawk niin US Centers for Disease Control and Prevention (CDC) chuan a tar lang.
DR Congo-a hri leng hi American paruk velin an kai nia hriat a nih thu CBS News chuan a tar lang ve bawk.
American pakhat chuan symptoms a nei nia hriat a ni a, mi dang pathum chu a kai nena inhnimhnai tak an nia sawi a ni a. A kai finfiah tak erawh an la awm lo.
CDC chuan ‘American mi tlem te, hriin a tihbuaite lak chhuah’ chu tha an tih thu an sawi a, engzat nge tih erawh hriat a ni lo.
US sorkar chuan DR Congo-a American pawl tenaute tan hmun hima an inkhung hran theih nan veivahna ruahmansak a tum niin thu dawnna chuan health news site STAT a hrilh.
WHO chuan DR Congo khawchhak lam Ituri province-a hri leng hi international concern public health emergency a nih thu a sawi a, hripui leng erawh a la tlin loh thu a sawi.
Agency chuan tuna hmuhchhuah leh report mek aiin ‘leng lian nasa zawk’ a nih theih thu a sawi bawk a, tual chhung leh ram bial chhunga a darh hlauhawm a ni tih a sawi.
Africa khawthlanga kum 2014-2016 chhunga Ebola leng khan mi 28,600 chuangin an kai a, kum 1976-a hmuhchhuah a nih hnua a len nasat ber a ni.
Hri hi Africa khawthlang pawn lamah pawh a darh a, Guinea, Sierra Leone, US, United Kingdom leh Italy-ah te a darh a, mi 11,325 an thi.
Africa Centers for Disease Control & Prevention Director General Jean Kaseya chuan invenna leh damdawi a la awm loh avangin mipuiten himna atana ruahmanna an zawm tur a ngai tih a sawi a, heng zingah hian thihpuite vui dan tur kaihhruaina pawh a tel.
Tun hmaa a lo len tawhah khawtlanga invuina, miin an chhungte an thlahnaah nasa takin a lo darh phah tawh a ni.
WHO chuan hri kai hmuhna ram pahnih, DR Congo leh Uganda chu ramri kaltlanga endikna nei turin a ti a, hei hi a darh zel tur venna atan a ni.
An bul hnaia ramte chu ‘inbuatsaiha inruahman turin’ a ngen bawk.
A thenawm ram, Rwanda chuan DR Congo nena an ramria screening khauh zawka kalpui a tum thu a sawi a, Nigeria chuan thil awm dan a thlithlai reng tih a sawi bawk.