Islamic State (IS) firfiak pawlte nena inzawmna nei hel pawl chuan Democratic Republic of Congo khawchhak lama mitthi vui inkhawma telte beiin mi 50 chuang an that niin thuneituten an sawi.
North Kivu province khaw pakhatah hian Allied Democratic Forces (ADF) mite hian zanah beiin a tam zawk hi chem (machete) hmangin an that tih thuneituten an sawi.
Tun hi ADF chetna tharlâm ber niin an pawl hi an chak thar zel hlauhthawnna a lian hle.
ADF hi kum 1990 chho vela Uganda-a indin niin sorkarin Muslim-te a tihduhdah thin niin an sawi a. Tunah hian DR Congo ramriah inkulh deuh berin ram pahnihah hian pawi tam tak an khawih.
“Thi zat 50 tih hi ka finfiah theih chiah lo va. Ntoya khuaa mitthi suna awm khawm lai beih an ni,” tiin khaw roreltu, Macaire Sivikunula-a chuan a sawi niin Reuters news agency-in a tar lang. DR Congo sipai thupuangtu, Lieutenant Marc Elongo chuan ADF fighter-te hian Thawhtanni zana mi an beiha sipai an thlen chuan ‘mi an suat nasa’ tih an hmuh thu a sawi.
ADF hian engmah an la sawi lo va; mahse, IS Central African Province chuan an tih a nih thu an sawi tawh a. Mi 100 chuang an that niin an sawi.
Tual chhunga thuthar thehdarhtu, Mishapi Voice Radio pawhin hetiang zat bawk hi thi angin a puang a, thil thleng hmutute chuan thenkhat chu an chenna inah hal hlum an ni tih an sawi niin a tar lang.
July thla tawp khan ADF hian DR Congo hmarchhakah naupang pakua telin mi 40 an that niin UN leh sipaiten a hun lai khan an lo sawi tawh.
Heng zinga a tam ber hi Komanda khuaa zana inkhawmte an ni.
DR Congo-a mitthi vui beihnaah mi 50 chuang thi
