DR Congo ngam loh Harry Kane

World Cup 2026 khelh mekah Nilai zan khan boruak nei lian England chuan Harry Kane goal hnih hmangin DR Congo an lehthal a, hnehna hlu tak changin last 16 an lut. Last 16-ah inelna thlengtu zinga mi Mexico an hmachhawn zui leh dawn a, inkhel hmuhnawm tak a nih ngei a rinawm.
Last 32 kal kawng
Football hmuchhuaktu, football a thawm na tak England hi Group L-ah Croatia, Ghana leh Panama te nen an awm tlang. Europe a team lian Croatia lakah 4-2 in hnehna an chang nghal a, bul an tan tha hle. Phur takin inlan zui bawk mah se an match hnihnaah Ghana an hneh zo lo. Ghana laka an chak zawh loh hnuin Panama an hmachhawn zui leh a, chak ngei tura ngaih an nih angin 2-0 in an chak. An hneh ngei tura ngaih Panama hi hneh tho mah se an khelh danin beisei a phak lova sawi sel an hlawh zui hle tho. Group L-ah hian point 7 hmuin champion ni chungin last 32 an lut. Panama lakah beisei an phak loh hnuin DR Congo an hmachhawn zui leh hi Three Lions vanneihnaah a ngaih theih.
DR Congo hi Group K-ah Portugal, Colombia leh Uzbekistan te nen an awm tlang. Champion tura rinkai ber zinga mi Portugal lakah tha zetin an inlan a, rin loh takin tlawm an pumpelh. Portugal laka tlawm an pumpelh hnuin Colombia an hmachhawn zui leh a, 1-0 in an tlawm. An match hnuhnung berah Uzbekistan an hmachhawn a, si an phurh hmasak zet hnuin 3-1 in an chak let a, point li hmuin last 32 an lut nawlh a, World Cup-ah an dai ngai loh ram an dai.
Hmuhnawm tur renga duan
Team lian leh langsar England leh team langsar lo tak DR Congo te inkhel hi WWE ang maiin a hmuhnawm thei ang ber tura thawnthu duan sa ang mai a ni a, rin phak baka inkhel hmuhnawm leh inbuktawk a ni. Chak lo tur zawka ngaih DR Congo in goal an thun hmasa a, an khel tha zui em em bawk a, England in hun rei tak an si phurh an sut thei lo. Si an phurh reng hnuin stiker hriam Harry Kane goal hnih thun hmangin England an chak let a, an khingpuite an lehthal. Dinhmun derthawng taka ding England in 2-1 in DR Congo an hneh a, last 16 an inhlangkai.
Tlawm tura ngaih deuh thup DR Congo in rin phak bakin an khel tha a, an khingpui England an ngam viau. An tlarhnung ven ringawt thupui lovin an khingpuite an nawr a, goal pawh an thun thuai. Inkhel tan atanga minute sarihna lekah Brian Cipenga chuan fuh taka pet goal in hmahruaina goal a thun a, England a baraih chiang hle.
DR Congo in goal an thun hmasa hi inkhel tihmuhnawm zualtuah a chang zui nghal. England in an si phurh sut ngei tumin tan an khawh a, an khingpuite an nawr na hle. Tlarhnung ven thiam DR Congo an inveng nasa hle a, an khel that bakah an vannei tel ve bawk. England in goal thun theihna hun tha a nei fo va, tha tak taka petin tauh fo mah se Congo si nghak Lionel Mpasi chuan pui zetin a lo dang zel a, an team a chhan him chho mawlh mawlh. Congo hian chawlhlawk hnu lamah goal an thun belh teuh viau a, Yoane Wissa chuan uiawm takin a hun tha neih a hlah. Wissa hian pet goal ngat se England dinhmun a chhe tak zet ang a, thlana phum ang hial an ni thei ang. An him hlauh a, beiseina mei eng an chhit zui theih phah.
An si phurh an sut theih loh reng hnuin Thomas Tuchel chuan Marcus Rashford leh Noni Madueke te lachhuakin Bukayo Saka leh Anthony Gordon te a luhtir. Gordon leh Saka te an luh hnuin DR Congo tlarhnung ten hna hautak zawk an thawh a ngai a, talbuai zuiin ngai an awh phak tawh lo. Bench atanga lut Gordon siamsak atangin a hun leh hmun dika che Harry Kane chuan fuh zetin a tauh goal a, minute 75-naah an si phurh a sut.
An si phurh an sut vangin England an phur a, na takin an khingpuite an nawr chhunzawm. Nasa taka inveng chunga goal an chhuah vangin DR Congo an hnual ve thung a, team lian lakah ngai an awh phak lova, an talbuai. Na taka an khingpuite nawr a, an dan bet tlat chu England in an hlawkpui a, goal an thun belh leh. Gordon hnen atanga ball a hmuh chu Harry Kane chuan fuh zetin a khalh rem a, hun tawp dawn hnaih minute 86-naah goal ropui a thun a, hma an hruai letna goal a thun.
Si phur zawka an tan hnuin DR Congo in an si phurh sut tumin tan khawh nasa viau mah se hun tha an nei thei tawh lo va, an ngam loh Harry Kane goal hnih thun chu Africa team hmuhnawm hian an tlawmpui a, uiawm takin last 16 an lut zo lova, World Cup 2026 an mangtha.
World Cup 2026-ah hmuhnawm taka inlan DR Congo hi World khelh dawn ruaiah Ebola in a tibuai a, an tum angin training pawh an nei hma thei lo. USA-a lut turin khung hran (Quarantine) hmasak zet an ngai a. Ebola vangin inkilh tawih tak chungin World Cup-ah an inlan a, beisei phak baka khel thain an hming an chher ta viau thung. World Cup 1974-a an chet chhiat vangin an player ten endawng hlawh zuiin an tan vanpui lo chim tawh mah se World Cup 2026-a an player te erawh chuan chawimawi an phu a, pasaltha, Sa hrang lu hawng ang hiala lawm leh ngaiohsan an hlawh tawh ngei ang.
Pele chungah Harry Kane
England goal thun khawl Harry Kane a chetha chhunzawm zel a, World Cup ah goal 13 thun tling tawhin World Cup a goal thun tam lamah footballber ropui Pele a khum. Pele khan World Cup-ah goal 12 a thun a, Kane hian goal khatin a khum. France player ropui Just Fontaine-a’n WC-a goal a thun zat a tluk chiah bawk. Season kal mekah club leh ram tan (World Cup 2026 pawh chhiar telin) Kane hian goal 72 a thun tling hial tawh a, season khata goal thun hnem ber Lionel Messi goal thun zat goal 82 tluk turin goal 10 ala mamawh. World Cup kal mekah goal 10 thun belh leh erawh a hautak tawh mai thei.