Kumin MLA inthlanpui atana electoral roll hman tur inpuahchah mekah, roll-a chuang chhinchhiah lailawk, draft electoral roll chu Nilaini khan district tinah tlangzarh a ni a. Mizoram pumah voter 838039 awmin, mipa aiin hmeichhia voter 24545-in an tam zawk.
Draft roll ang chuan Aizawl district-a Assembly constituency 12 awmah voter mipa 131867 leh hmeichhia 149325, a vaiin 281192 an awm a. Polling station 321 awmin voter tlemna ber polling station chu 7Tuivawl biala Chhanchhuahna P/S niin, 96 an awm. Voter tamna ber chu Aizawl North-Ill biala Edenthar-II P/S niin 1398 an awm.
Aizawl district-ah hian electoral roll-a chuang zawng zawng EPIC pek vek an ni tawh a ni. Draft e-roll hi district election officer (DEO) Nazuk Kumar chuan a tlangzarh a ni.
Mamitah chuan DEO VL Remliana’n a tlangzarh a. An district-ah vote nei mipa 32155 leh hmeichhia 31533, an vaiin 63688 an awm. Polling station 121 awmin Mamit biala Damparengpui-I P/S-ah voter 1043 awmin voter tamna ber an ni a, Tlangkhang P/S-ah voter 35 awmin a tlemna ber an ni. Tripura-a inbengbel tawh Mizorama vote nei 4941 paih an ni a, voter 9 transfer nen a vaiin 4950 paih an ni.
Kolasibah chuan DEO John LT Sanga’n a tlangzarh a. An district-ah voter mipa 30295 leh hmeichhia 32364, an vaiin 62659 an awm. Mipa 1000 zelah hmeichhia 1068 awm anga chhut a ni. Tuirial bialah voter 18249, Kolasib bialah 23713, Serlui bialah 20697 an awm a. Kolasib district atanga pem chhuak Bru voter 1094 chu electoral roll atanga paih an ni a; kum tling thar leh chhan hrang hrang avanga roll-a hming ziahluh dilna 785 pawm a ni.
Mizoram district tina vote nei mipa leh hmeichhia vote nei mek zat
S.N. DISTRICT MIPA HMEICHHIA TOTAL
1. Mamit 32155 31533 63688
2. Kolasib 30295 32364 62659
3. Aizawl 131867 149325 281192
4. Champhai 27560 28878 56438
5. Serchhip 26118 27695 53813
6. Lunglei 48841 49675 98516
7. Lawngtlai 44846 44903 89749
8. Siaha 21192 22377 43569
9. Saitual 27326 27774 55100
10. Khawzawl 8690 8750 17440
11. Hnahthial 7857 8018 15875
Total 406747 431292 838039
* Mizoram pumah service voters mipa 4932 leh hmeichhia 89, a vaiin 5012 a awm mek bawk.
Lawngtlaiah chuan DEO H Lalhmingthanga’n a tlangzarh a. Assembly bial pathum awmah vote nei mipa 44846 leh hmeichhia 44903, an vaiin 89749 an awm a ni. Tuichawng bialah 35372, Lawngtlai West bialah 28825, Lawngtlai East bialah 25552 an awm a ni. Electoral roll hnuhnung ber nena khaikhinin bial thumah voter an pung zawk theuh a; Tuichawngah 74, Lawngtlai West-ah 124, Lawngtlai East-ah 130-in an pung.
Champhaiah chuan DEO James Lalrinchhana’n a tlangzarh a. Voter mipa 27560 leh hmeichhia 28878, an vaiin 56438 an awm. Roll hmasa aiin voter 76-in a pun belh. Champhai North-ah voter 19843, Champhai South-ah 20897, East Tuipuiah 15698 an awm a ni.
Lungleiah chuan DEO Ramdinliani’n a tlangzarh a. Polling station 176 awmin, voter mipa 48841 leh hmeichhia 49675, an vaiin 98516 an awm. Lunglei North-ah 17561, Lunglei East-ah 15962, Lunglei West 15404, Lunglei South 18638, Thorang 14634, West Tuipui 16317 an awm a ni.
Khawzawlah chuan DEO K Lalrohlua’n a tlangzarh a. Assembly bial pakhat, Tuichang bial chauh awmin, polling station 28 ah vote nei mipa 8690 leh hmeichhia 8750, an vaiin 17900 an awm. Khawzawl Vengthar North P/S-ah vote nei tam berin 1025 an awm a, vote 114 awmna Arro P/S-ah vote nei an tlem ber.
Hnahthialah chuan addl. DEO Lalvenhima’n South Tuipui biala draft roll a tlangzarh a. Polling station 27-ah vote nei mipa 7857 leh hmeichhia 8018, an vaiin 15875 an awm. Polling Station voter tamna ber chu Hnahthial-IV niin 1197 an awm a, a tlemna ber chu New Kawnpui P/S niin 52 an awm. Vote nei punna hi 0.91% a ni.
Siaha ah chuan DEO Lalhmunsanga Hnamte chuan a tlangzarh a. Assembly bial pahnih awmah voter mipa 21192 leh hmeichhia 22377, a vaiin 43569 an awm. Saiha bialah voter 23426 leh Palak bialah 20143 an awm a ni.
Serchhipah chuan DEO David Lalthantluanga’n a tlangzarh a. Vote nei mipa 26118 leh hmeichhia 27695, an vaiin 53813 an awm. Serchhip bialah 20409, Tuikum bialah 16843, Hrangturzo bialah 16561 an awm a ni.
Saitualah chuan DEO Dr Lalngura Tlau in a tlangzarh a. Vote nei mipa 27326 leh hmeichhia 27774, an vaiin 55100 an awm. Chalfilh bialah voter 19741, Tawi bialah 16997, Lengteng bialah 18362 an awm a ni.
Special Summary Revision of Photo Electoral Roll 2023-ah hian qualifying date chu 2023 October 1 2023 a ni a. Hemi ni a kum 18 tling hman tur, India khua leh tui diktakte tan electoral roll-a inthun dil theih a ni. Hemi rual hian siamthat ngai siam, paih ngai paih leh insawn duhte siamfel theihna hun hawn a ni a, August 2-31 chhung hawn a ni ang. Kumin October 4-ah final roll tihchhuah tum a ni.