Kolasib Agro Marketing Cooperative Society Ltd. chuan Kolasib district chhunga kuthnathawktute tharchhuah Dragon fruit a lei dawn.
Zirtawpni khan district horticulture officer Lalnunpuia hoin Kolasib district khaw hrang hranga dragon fruit chingtu aiawh an inhmukhawm a. DHO hian Dragon fruit chingtute tana sawrkar hmalak dan tur a sawi.
Kolasib district chu ‘One Village One Crop’ kalpuina turah dragon fruit chinna hmun atana thlan a ni a, chumi tihlawhtling tur chuan department-in hma an la mek tih a sawi.
Kolasib-a society pakhat, Kolasib Agro- Marketing Cooperative Society Ltd. (KAMCO) in Kolasib district-a dragon fruit tharchhuah kumin atanga lei tan tumin a inbuatsaih tih an chairman R Lalhmingthanga chuan sawiin, KAMCO hian FOCUS Mizoram hmalakna atangin dragon fruit juice processing a kalpui tur thu leh fresh fruit marketing kalpui tur chuan dragon fruit chingtute harsatna chu a zawng zawngin chhawk thei rih lo mah se, sawrkar nen tangdunin theihtawpa kuthnathawktute harsatna sutkian pui tura tha thawh an tum thu a sawi. Mizoramah dragon fruit kan thar hma hauhin state pawn atangin a juice demand an dawng lawk tawh tih a sawi bawk.
Dragon fruit sawngbawltute KAMCO-in a rah lei dawn
