Drake-a’n Alex Warren ‘Ordinary’ a nawr tawlh zo lo

Drake-a’n Alex Warren ‘Ordinary’ a nawr tawlh zo lo
Alex Warren hla hit ‘Ordinary’ chu Billboard Hot 100 (singles) chart-ah a No.1 a, he chart-a kar ruk a No.1-na a ni ta a, Drake hla thar ‘What Did I Miss?’ chu No.1-a debut thei tura an beisei laiin, ‘Ordinary’ a nawr tawlh zo lo a, No.2-ah a debut. Hetihrual hian HUNTR/X pawh top 10-ah an debut.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Alex Warren ‘Ordinary’ hian kar khat chhungin stream maktaduai 19.1 leh sales 6,000 a la nei thei a, radio airplay pawh ngaithlatu maktaduai 73 la awmin, a zawnin kar ruk chhung chart-ah a No.1 ta a ni.
Drake hla thar “What Did I Miss?”-in stream maktaduai 22.6, sales 6,000 leh radio airplay ngaithlatu maktaduai 3.6 neiin, No.2-ah a debut a, Drake hla chart top 10-a lang thei 81-na niin, he chart top 10-a lang thei hla ngah ber a nihna a sawhnghet leh ta sauh a ni.
Chart No.1 hlui Morgan Wallen ‘What I Want’ featuring Tate McRae chu No.2 atangin No.3-ah a tawlh a, Wallen hla dang ‘Just in Case’chu No.3 atangin No.4-ah a tawlh a, a hla dang, chart No.1 pawh lo ni tawh ‘I’m the Problem’ chu No.5 atangin No.8-ah a tawlh ta bawk.
Morgan Wallen hian kar 10 chhung chu a zawnin kartin he chart top 10-ah hian hla pathum a la nei ziah a, The Beatles leh Kendrick Lamar nihrualin, he chart-a kar khata chart top 10-a hla pathum chin nei ngun zingah a palina an ni. Hetiang record siamtu chu Drake niin, kar 19 chhung kar khata chart top 10-a lang thei la pathum chin a nei thei a, 50 Cent (15) leh Justin Bieber (11) ten an dawt.
HUNTR/X ‘Golden’-in stream maktaduai 18.8, sales 3,000 leh radio airplay ngaithlatu 9,50,000 neiin, No.23 atangin No.6-ah a invawrh. He hla KPop Demon Hunters soundtrack a ni.
Chart No.1 hlui, Shazoozey ‘A Bar Song (Tipsy)’ chu No.4 atangin No.5-a a tawlh a, chart No.1 hlui bawk Kendrick Lamar & SZZ “Luther” chu No.6 atangin No.7-ah a tawlh, he chart-a No.1 hlui bawk Teddy Swims ‘Lose Control’ chu No.8 atangin No.9-ah a tawlh a, chart No.1 hlui Lady Gaga leh Bruno Mars ‘Die With a Simle” chu No.9 atangin No.10-ah a tawlh ta bawk.
Hot 100 Top 10 a lang thei hla ngah zual te chu:
81, Drake
59, Taylor Swift
38, Madonna
35, The Beatles
32, Rihanna
30, Michael Jackson
29, Elton John
28, Mariah Carey
28, Stevie Wonder
27, Janet Jackson
26, Justin Bieber
26, Lil Wayne
25, Elvis Presley