DRC-a inbeihnaah mi 7,000 chuang thi tawh
Democratic Republic of the Congo (DRC) Prime Minister Judith Suminwa-i chuan thla hmasa aTanga an ram khawchhak lama inbeihna thlengah mi 7,000 chuang an thi tawh tih a sawi a, an zingah civil mi tam tak an tel tih a sawi.
ThawhTannia Switzerland-a United Nations Human Rights Council-a thu a sawinaah Suminwa-i chuan ‘DRC khawchhak lama himna chu a derthawn lai ber a thleng’ tih a sawi.
North Kivu province-a Goma khawpuiah ringawt pawh mi 3,000 chuang an thi niin prime minister hian a sawi.
Ruang 2,500 chuang tute nge an nih finfiah lohva phum an ni a, ruang dang 1,500 vel ruang dahna inah an la awm thu a sawi bawk.
“Hengho zingah hian civil mi tam tak an tel a ni,” a ti.
January aTang khan Rwanda-in a thlawp M23 hel pawl chuan DRC khawchhak lam zau tak an la tawh a, heng zingah hian Goma leh South Kivu khawpui, Bukavu pawh a tel.
Hel pawl hmasawn chak tak chetna hi khawvel hruaitute ngaimawh pawh a hlawh hle a, UN Secretary-General Antonio Guterres-a pawhin inbeihna chuan ‘heng lai ram bial boruak chu a tichhe vek dawn’ niin a sawi.
Rwanda chuan DRC, UN leh khawthlang sorkarten ralthuam leh sipaiah helho an pui Thin nia an puhna chu an pha.
ThawhTannia Geneva-a thu a sawinaah hian Suminwa-i chuan ram dangte chu che chhuaka mi tam tak baihvai leh a ruala mi thahna a thleng nia sawi a awm mek laiin Rwanda chu hrek turin a ngen.
“Buaina avanga mi maktaduai tel te ri leh tam thawm hi sawi fiah ngaihna a awm lo,” a ti.
Guterres-a pawh Human Rights Council-ah he rama thil thleng chu ‘tharum thawhna avanga thihna leh mihring dikna chanvo palzutna a vir mup mup’ ang a nih thu a sawi.
“DRC-in ram hrang a nihna leh ram chin a neih hi zahsak tur a ni,” tiin UN chief chuan a sawi a. “Khawpui dang a tlu leh a nih chuan indona zau zawk a hring thei dawn a, tun hi silai ri tihtawp hun a ni,” a ti.
Helho hian thla hmasaa Goma an lak hnuah kar hmasa mai khan Bukavu an thunun leh.
Chawlhkar hnih chhung lekin tlanchhia mi 40,000 chuangin an Thenawm, Burundi ram an pan niin Zirtawpni khan UN chuan a sawi.
M23 hi DRC khawchhak lama ram leilung hausa tak hmun thunun tumtu hel pawl 100 chuang zinga a chak ber an ni.
UN mi thiamte chuan hel pawl hi an Thenawm, Rwanda sipai 4,000 chuangin an pui niin a sawi.
DRC-a inbeihnaah mi 7,000 chuang thi tawh
