Dream final ; Spain vs Argentina

World Cup 2026 chu a hmawrbawk a ni dawn ta a, Pathianni zan zan lai dar 12:30-ah khelh tan a ni dawn. Final hi MetLife Stadium, New Jersey khelh a ni dawn a, Spain leh Argentina te an inhmachhawn ang. FIFA ranking a No. 1 Argentina leh No. 2 Spain te an inhmachhawn dawn vangin ‘Final duhthusam’ (Dream final) tih a ni.
Final kalkawng
Champion lai Argentina hian Lionel Scaloni hnuaiah hma an sawn hluai a, inelna an hmachhawn tawh zawng zawngah an la champion vek. South America khawmual atanga World Cup khel tur zawnnah pawh an champion leh a, CONMEBOL champion niin World Cup 2026 khel turin an tling.
World Cup 2026-ah Group J-ah an awm a, group match ah an khel tha hle. An khelh hmasak berah 3-0 ngawtin Algeria an sawp a, an goal thumte hi Lionel Messi thun vek a ni. An match hnihnaah 2-0 in Austria an hneh zui leh a, vawi hnih an khelh atangin group champion an ni chiang nghal. Group champion an nih tawh vangin an B team ten Jordan an hmachhawn a, 3-1 in hnehna an chang zui leh.
|ha taka group stage an khar hnuin knockout stage-ah erawh inkhel harsa an hmachhawn vek a, hnehna an chang tawk zel. Cape Verde hneh turin extratime an mamawh a, 3-2 in an chak thei hram. Last 16-ah Egypt an hmachhawn zui leh a, 2-0 ngawta an hnufual hnuin harsa takin an thochhuak a, 3-2 a chak hramin quarter-final an lut. Quarter-final-ah Harsa takin Switzerland an hneh zui leh bawk. Semi-final-ah an hmelma lian England lakah si an phur hmasa zet a, inlehthalna lian thlentir leh ta tho a, 2-1 a chakin final an lut. Final an luh thlengin an khingpuite lakah goal 20 an thun a, goal 7 an chhuah.
Euro 2024 champion Spain hi Europe atanga World Cup khe tur zawnnaah Group E-ah an awm a, vawi nga chakin, draw vawi khat an nei a, group champion ni chungin an tlang. World Cup 2026-ah Group H-ah an awm. An khelh hmasak berah bul an tan tha lova, World Cup-a hmel thar Cape Verde nen goal awm lovin an inhnehtawk ringawt. Bul an tan that loh hnuin an insiamtha a, 4-0 ngawtin Saudi Arabia an sawp a, 1-0 in Uruguay an hneh zui leh bawk. Group Stage-ah beisei angin khel tha viau lo mah se knockout round ah team tha an nihzia an lantir chho zel. Last 32-ah 3-0 in Austria an sawp a, last 16-ah team boruak nei lian leh champion tura rinkai ber Portugal chu 1-0 in an hneh zui leh bawk. Quarter-final-ah 2-1 a Belgium an hneh hnuin semi-final ah champion tura rinkai ber ni France an hmachhawn zui leh. France lakah an thatzia an lantir nawn leh a, 2-0 a hnehna changin final an inhlangkai.
Spain hian final an luh thlengin an khingpuite lakah goal 13 an thun a, goal khat chiah an chhuah. Khelh 7 atanga clean sheet vawi ruk ngawt an neih tawh vangin an si nghak Unai Simon chuan Golden Glove a dawng dawn tih a chiang der tawh bawk.
Head to head
Argentina leh Spain te hi football thiam ram, World Cup-ah pawh lo champion tawh ve ve an nih bakah an awmna khawmuala champion lai an ni ve ve bawk. South America champion Argentina leh Europe champion Spain te hi Finalissima a inhmachhawn tur an nih laiin thulh a ni. Inhmachhawn thei lo mah se World Cup final-ah an intawng tawn ta tho a, Finalissim a ni tel tho dawn. Fifa ranking a No 1 & 2 te inhmachhawn tur an nih vangin ngaihven an hlawh a, inkhel hmuhnawm tak a nih a rinawm.
Argentina leh Spain te hi inelna hrang hrangah vawi 14 an lo inhmachhawn tawh a, vawi ruk ve ve chakin chungnung zawk an awm lo rih a, vawi hnih dang an inhnehtawk thung. Final-a chak zawk zawk hian an inkarah 7-6 in hma an hruai dawn. World Cup-ah hian vawi khat chiah an la intum a, World Cup-a an intum awmchhun 1966-ah 2-1 in Argentin an chak.
Team inhrechiang
Argentina leh Spain te hi khawmual hran daiha awm ni bawk mah se La Liga-ah Argentina player an tam thin vangin team inhrechiang tak an ni. Argentina captain Lionel Messi hi Barcelona academy La Massia chhuak a ni a, Barcelona player ropui ber a ni zui ta bawk nen Spain player ten an hriat chian leh an ngaihsan em em, an Idol a ni.
Argentina team-ah hian La Liga a khel mek pasarih ngawt an awm a, La Liga a lo khel tawh thin an awm nual bawk. Lionel Messi ropuina hmun chu Barcelona a ni a, Barcelona player te Idol a la ni reng. Spain squad ah hian Barcelona player 8 leh La Massi chhuak pakhat an awm bawk. Barcelona player ten an Idol Messi an hmachhawn thei tur hi a phurawm viau dawn a, an tan chona lian tak a ni ngei dawn bawk. Kum 39 mi Lionel Messi leh kum 19 mi, ‘Messi malsawmna dawng’ an tih mai thin Lamine Yamal te inhmachhawn tur hi en a chakawm viau bawk.
A hmuhnawm dawn
Argentina leh Spain te hi player inhrechiang tak tak an nih bakah khelh dan phun inang, ball thiam rual leh pumrua pawh intiattawk tak mai an ni a. Final a an inhmachhawn tur hi a hmuhnawmin, a class a sang hle ngei ang.