Drone-in Russia leh Ukraine inbei nasa
Russia leh Ukraine chu drone hmangin nasa takin an inbei tawn reng a, hetih lai hian Moscow chuan indo tihtawpna tura rawtna an peih hnai tih a sawi.
Ukrainian air force thuneitute chuan Thawhlehni khan Russia-in drone 60 hmangin a hma zan khan region hrang hrang an bei tih sawiin mi 10 an hliam tih an sawi a. Kyiv-a air defence hmangin 43 an lo dang a, 35 chu kah thlak niin pariat chu electronic warfare system hmangin a kawng an tikawi niin an sawi.
Ukraine hian Pathianni khan indona a chhuah hnua ni khata drone hmanga beihna a tawh nasat ber tawngin Russia-in 355-a an beih thu an lo sawi tawh.
Russia chuan Thawhlehni khan van sanga beihna an tih nasat thar chhan hi Ukrainian drone-in civil mite an beih ‘chhan letna’ niin an sawi a, Kyiv chuan muanna kawng zawh ‘tihbuai a tum’ niin a sawi.
Russian defence ministry chuan Thawhlehni khan Ukrainian drone 99 an kap thla tih a sawi a, heng zinga 56 hi an inrina, Belgorod region-ah a nih thu a sawi.
May 20 leh 27 inkar khan Ukrainian drone 2,300 zet an dang tih sawiin heng zinga 1,465 hi indona chhuahna pawn lama mi a ni nghe nghe niin a sawi bawk.
Hetih lai hian Russian sipaite chuan Ukraine hmarchhaka Sumy region-a khaw pali an lak belh niin governor-in Thawhlehni khan a sawi.
Oleh Hryhorov-a chuan Novenke, Basivka, Veselivka leh Zhuravka te chu Russian thununna hnuaia a awm thu leh civil mite an thiar chhuah thu a sawi.
Russian defence ministry chuan a bul lawka Bilovody pawh an la niin a sawi bawk.
Moscow hian hma a lakna ber erawh Donetsk a la ni a, Sumy-a thil thleng hian Russian sipaite hi Ukraine-a sipaite hmaah an inzar pharh thui hle tih a lantir nia ngaih a ni.
Ukrainian President Volodymyr Zelenskyy-a chuan Russian-te hi Sumy, Kharkiv leh Zaporizhzhia-ah thapui an thawh nasa niin a sawi bawk.
Russian sipaite hian motorcycle hmangin mi tlem te, drone-in a puihten an che chhuak thin a. Ukrainian sipaite hian inring taka lo chângin an lo hmachhawn thin.
Military blog DeepState chuan kartawp chhung khan Russia hian sq km 62.6 an la niin an tar lang a ni.
Drone-in Russia leh Ukraine inbei nasa
