Mizoram Police chuan tun ni hnih kalta chhung khan drugs leh dan loa tawlh kuhva rah thahnem tak an man.
February 8 chawhma dar 11.50 khan Mizoram Police leh 42 Assam Rifles chuan Champhai district Zokhawthara Vawmkaw lui chhehvelah joint operation neiin, methamphetamine nia hriat mum 30300, kg.3.452 a rit an man a, a kawltu nia sawi Harik Uddin, Karimganj district Assam hnen atang hian sumfai Rs. 17,49,500 an man tel. A lirthei hman TR-01 B2 0381 pawh man niin Zokhawthar Police Station ah thubuai ziahluh a ni.
Champhai Police leh Assam Rifles thawkdun hian Champhai atanga Zokhawthar pan taxi MZ-04 A 8953 atangin Zokhawthar bul Mualkawi daiah Nilaini zan dar 10.00 vel khan heroin gram 605 (hawng 50) an man a, taxi khalhtu Lalremruata (23), Zokhawthar chu thubuai siamsak a ni.
February 7 zing dar 2.10 khan Hnahlan Police Beat Post duty chuan Hnahlan khaw daiah dan loa tawlh kuhva rah hring bag 40, truck MZ-01 W 1086 atangin an man. Bag khatah hian kg.80 awmin, tualchhunga an inleichhawn sak dan chuan bag khat hi Rs. 640000 hu a ni. Kuhva rah neitu leh lirthei khalhtu nia sawi F Lalmalsawma (38), Hnahlan Tlangnuam Veng chu Customs hnena hlan a ni.
February 7 zing dar 5.00 khan Khankawn Police Checkgate Chalbawiha Junction-a duty leh Champhai Police Station OC hoa patrolling party-ten kuhva rah bag 100 chu truck MZ-02 7941 atangin an man a, a khalhtu hi Malsawmkima, Melbuk a ni. Truck MZ-01 B 7387 atangin kuhva rah bag 100 tho manin, a khalhtu hi Thiansuanpianga (21), Melbuk Champhai district niin, kuhva neitu hi Saikhumi (57), Melbuk nia hriat a ni.
2021 January 1 atanga tun thlenhin Champhai Police an district chinah heroin kg. 3.380, methamphetamine kg. 15.152, crystal meth kg. 10.385 bakah dan loa tawlh kuhva rah bag 45190 an man tawh a ni.
Drugs leh kuhva rah man
