Mizorama politician leh political party-ten duh duh sawi theihna hmuna politics an ngai chu pawi an tih thu BJP chuan an sawi.
BJP Mizoram thuchhuak chuan, Mizorama politician tam zawk chu mipui hmaa thutiam thiam tak, a taka hma la leh thei lo an nih thin avangin mipuiin politics kan hmelhriat dan a dik thei lo a, thutiama ding political party leh politician kan mamawh tawh tih a sawi.
Kum 2018 inthlan dawna sawrkar lai MNF-in sikul thenkhat, adhoc grant in aid-a puan tura a lo tiam tawh tihpuitlin phut a, zirlaiten an thil phut tihhlawhtlinna tura ke meuha Aizawl an kal hmuh khan rilru a ti na takzet tih sawiin, ‘Mizoram politician-te hian politics hi infiamna emaw fiamthu thawhna hmun emaw dawt sawina platform emawa kan ngai leh, duh duh sawi theihna hmun emaw kan ti hi pawi kan ti a. Mipui hmaa kan thutiam tawh tihpuitlin hi sawrkar tha chuan a kentel a ni. Mahni thutiam tihlawhtling thei lo chu mi rintlak loh an ni. Inthlana tlinna atan chauha campaign-na hmanrua atana mipui chaklohna lai kan hmang fo hian mipui min zah loh zia leh sawrkar tha leh manifesto tih puitlin aia, lalna leh thuneihna nuam ti a, politics khel ve mai mai chauh an nih zia a ti langchiang hle,’ a ti.
‘Mizoram hi Kristian tamna, CM atanga cabinet minister, MLA thlenga Kristian, kan nun danah erawh Krista hmel hmuh tur awm miah lo kan nih hlawm avangin kan rawngbawlna pawhin a tawrh phah hle ah kan ngai a. Mizoram hi Mizote ta a nih avangin, BJP Mizoram chuan dik tak leh fel takin rorelna kan kalpui dawn a, Krista ram tizau turin sawrkar tha kan mamawh tih hre chungin, mipui sawrkar, mipui hnena kan intiamna, 2023 manifesto tipuitling tur leh Mizoram retheihna sal ata khaichhuah hna thawk turin MLA inthlan turah pawh hma kan la zel dawn a ni,’ thuchhuah chuan a ti.
Duh duh sawi theihna hmuna politics kan ngai hi a pawi – BJP
