Bawngkawn – Leitan inkara petrol pump tura ruahman, a chhak lei che in mihring nunphung a tih buai tak avangin, hma lak zel dan tur enchiangin sawrkar leh a kaihhnawih midangte chuan Ningani khan a hmun an tlawh a. An report ang hian sawrkarin ruahmanna a siam dawn a ni.
District Disaster Management Authority Aizawl chuan hemi chungchangah hian a kaihhnawih sawrkar mite leh khawtlang hruaitute, pump siam tumtute leh environmental activist-te nen Ningani khan lei laihin a nghawng dan hi an enfiah a. Aizawl Municipal Corporation, Geology & Mining department, Disaster Management & Rehabilitation department, BRTF, Leitan leh Bawngkawn Local Council, Durtlang Road Joint Action Committee, a ram neitu/ laitu atangin ngaihdan an sawi a. Hemi ang hian DDMA zonal officer chuan an chairman, Aizawl bawrhsap hnenah report a thehlut a. He report zulzui hian sawrkar chuan ro a rel zui tura ngaih a ni.
Tuna lei chet dan enin, helai kawng zawh thin mipui him zawkna atan petrol pump siam tumtute hian hma la zui zel lo se, tih chu Durtlang Road JAC leh zonal officer ngaihdan a ni a. A tlang chhip lama lung/ lei tla mai thei chu tih tlak a, net (galvanized wire mesh & protective mat fencing) hmanga lung/lei tla thei tur dan dan ngaihtuah chu hna hmanhmawha ngaih a ni.
Durtlang kawng lei laih enho
