Dy PM thah tumtu, kum 30 tlan bo tawh mi firfiak man

Dy PM thah tumtu, kum 30 tlan bo tawh mi firfiak man
Kum 2011-a LK Advani-a deputy prime minister a nih laia thah tuma ruahmanna pawh lo siam tawh, Tamil Nadu-a mi sual an man duh ber chu Tamil Nadu Police-a Anti-Terrorism Squad (ATS) chuan kum 30 dawn an zawn hnuah Thawhlehni khan an man.
Abubacker Siddique-a hi Andhra Pradesh-a a khawsakna hmun kilkhawr takah man a ni.
Kum 60 mi, Siddique-a hi Nagore khawmi a ni a, Mohammed Ali (Yunus leh Mansoor tia koh) nen man an ni a, ani pawh hi firfiaka chetnaa inhnamhnawihna nei nual a ni.
An thu dawn bawhzuiin ATS hian an chhui zui a, Annamayya district, Andhra Pradesh-ah an pahnih hian an man ta a ni.
Siddique-a hi bomb siam thiam a nih bakah thil la binga a pawikhawih zawnga che thin a ni a, kum 1995 atang khan man tum ni tawhin a luman pawh Rs nuai 5 chhiar a ni a. Tamil Nadu leh an thenawm state thenkhata pawikhawihna ruahmantu ber a ni.
Police chuan Siddique-a man a ni hi mi firfiak beihna kawnga hmasawnna lian tak niin an sawi a. A pawikhawihna zingah kum 1995-a Hindu Munnani office, Chintadripet, Chennai-a bomb tihpuah leh hemi kum veka Nagore-a tihpuah, mi pakhat thihna pawh a tel.
Kum 1999 khan hmun sarih – Chennai, Trichy, Coimbatore leh Kerala-a hmun thenkhata bomb kamnaah pawh a tel a. Heta an bitum zingah hian Egmore-a Chennai Police Commissioner’s Office pawh a tel.
Hemi tuma hmun eng emaw zata bomb kamnaah hian a ruala an man tel, Melapalayam, Tirunelveli-a mi, Ali-a pawh inhnamhnawiha hriat niin ani pawh hi kum 26 zet man tuma zawn tawh a ni.
Tamil Nadu Police chuan Siddique-a hian kum 2011 khan khatih laia deputy prime minister, Advani chu Madurai-a Rath Yatra-a a tel laiin thah a lo tum tawh a, a hlawhchham hlauh niin an sawi.
Kum 2012 khan Vellore-a Dr. Arvind Reddy-a a thah avangin thiam loh chantir a ni a. Tlanchhe chungin kum 2013 khan BJP office bul, Malleswaram, Bengaluru-ah bomb a tipuak leh bawk niin police chuan an sawi.
Siddique-a leh Ali-a hi judicial magistrate hmaah hruain custody-ah kawl rih an ni a. Thu zawh fiahna atangin India chhim lama mi firfiakte inphan kual dan pawh thui tak hriat theih beisei a ni.