Thawhlehni zan khan Indian Supuer League (ISL) khelh chhunzawm a ni a, Kolkaata club lian East Bengal chuan an mikhual Mohammedan SC chu 7-0 ngawtin an sawp a, an mualah awlsam takin hnehna an chang. An mualah hnehna lian an chan vangin Red & Gold Brigade hi palinaah an inhlangkai.
East Bengal hian an mualah bul an tan tha a, goal an thun hma hle. Inkhel tan atanga minute 6-na lekah Anwar Ali chuan hmahruaina goal a thun nghal. Hma taka goal an thun hnuin an chefuh chhunzawm a, penalty an hlawhchhuak leh thuai. Penalty hi Youssef Ezzejjari chuan a pet goal a, minute 14-naah an goal hnihna a thun. Hma takah goal hnih an chhuah vangin goal thun mamawh viau mah se Mohamedan an vannduai chhunzawm a, minute 35-naah Mizo player Joseph Lalmuanawma hnawhchhuah a ni. Penalty a chawi tel bawk. Tlem zawk an nih hnu lawkah mikhual team hian goal an chhuah zui leh thuai a, Saul Crespo chuan minute 38-naah an goal thumna a thun a, 3-0 ngawta hmahruai chungin chawlhlawk an hmang.
Chawlhlawk hnu lamah East Bengal an khel tha chhunzawm a, goal an thun belh leh thuai. Minute 55-na lekah penalty atangin oussef Ezzejjari chuan an goal lina a thun a. Hemi hnu hian Vishnu PV leh Nandha Kumar Sekar ten goal khat ve ve an thun a. Goal hmahruai thuntu Anwar Ali pawhin goal khat a tun ve leh bawk a. An muala 7-0 ngatin a chak a, hnehna lian an sual chhuak.
An mualah awlsam taka hnehna chang Red & Gold Brigade hian khelh 6 atangin point 11 an hmu a, table-ah hmasawnin palina an luah. Palina luah mek mah se pasarihnaa awm mek Punjab FC tan pawh lehpelh theih reng an la ni tho thung a, an dinhmun a him lo viau rih.
ISL 2026-27 season kal meka Table chung ber luahtu chu Lallianzuala Chhangte captain nihna Mumbai City te an ni.
E . Bengal an chak awlsam
