EBOLA: DRC-ah hri vanga thi phumtute mipuiin bei

EBOLA: DRC-ah hri vanga thi phumtute mipuiin bei
Democratic Republic of Congo khawchhak lam, South Kivu province-ah Ebola vanga thi phumtu team chu mipuiten an bei a, thawktute hian kuang pakhat an kalsan phah a, hri a darh hlauhthawn a nih thu health ministry-in a sawi.
He thil hi Thawhtannia han AFC/M23 helte thunun khua, Katana-a thleng a ni a, province khawpui, Bukavu hmar lam km 30 vela hlaa awm niin ministry leh tual chhung damdawi in hotuin a sawi tih Reuters-in a tar lang.
Dan zam anga hri kai thite ruang sawngbawl tura a bik taka zirtirten ruang an buaipui lai beih an ni.
Ruang hi mipuiten an la zui a, hei hi hri inkai darh theihna, inkaichhawn zelna thar thlen thei a ni tih Nilainia online-a thil thlen dan report tihchhuahah tar lan a ni.
Health ministry leh damdawi in hotu chuan engvanga hetiang hi thleng nge an la sawi chiang lo.
He thil thleng hian thuneituten Ebola Bundibugyo chi darh zel thunun tuma hma an lak mekna a tikhawtlai zel a. Tun hnai kar eng emaw zat chhung khan mi phumtu team leh damdawia thawkte beih an ni fo va, thi chhungte pawhin thih chhan an zawt fiah nasa hle.
Thawhtanni pawh khan Bundibugyo kai hmuh hmasak berna, Ituri province khawpui, Bunia-ah hetiang thil thleng hi a thleng a, thlanmual pakhatah mipuite chuan hri leng buaipuitute an bei a, mi pali an hliam nia sawi a ni.
Health ministry-in a chhinchhiah dan chuan Congo-ah hian May 15 atanga hri leng, an rama vawi 17-na puan a nih hnuah mi 363 kai an awm tawh a, mi 62 an thi tawh.
Damdawi in thuneitute chuan tun hnaiah hri kai hmuh thar 19 an awm a, pahnih an thi a. Ituri province-a health zone 36 zinga 17-ah hri hi a darh tawh tih an sawi.
Hri kai hi an pung zel a, North Kivu province-a health zone pasarih leh South Kivu province-a zone pakhatah hri kai hmuhchhuah tawh a ni.
International Organization for Migration ⁠chuan Ebola lenna province pathum-ah health control post 30 dinnaah a pui mek a, hei hian mipuite hriselna a enfiaha damloten hri an tidarh zel tur venna atan a pui niin UN agency regional head Frantz Celestin chuan Ningani khan Reuters a hrilh.
Ministry chuan hmasawnna pawh a awm tih an sawi a. Ituri-a Rwampara-a hri kai nena inhnimhnai 32 chu ni 21 enthlak tawh niin Ebola an vei lo niin an ngai.
Ministry chuan North Kivu-a Goma khawpuia thuneitute chuan dam tawh chhuahtir turin an inbuatsaih mek tih a sawi bawk a. AFC/M23 helho deputy coordinator Freddy Kaniki-a chuan Nilaini khan damlo hi a chhungte nen an inhmu leh tawh tih X-ah a tar lang.
Congo khawchhak lamah ram dang atanga puihna a luh belh zel bawk a. Nilaini khan Bunia-ah thite phumna atana hman tur hmanrua 300 a thleng tih International Federation of Red Cross & Red Crescent Societies chuan Ningani khan a sawi.