Lok Sabha inthlan hun puan dawn ruaiah Election Commissioner Arun Goel chu March 9 khan a bang.
Law Ministry in hriattirna a chhuahah Arun Goel banna chu President Droupadi Mumru chuan a pawm nghal a ni.
Goel hian kum 2027 thleng hun la nei a ni chungin a bang ta a, a ban takah chuan Election Commission chuan member pakhat chauh Chief Election Commissioner Rajiv Kumar chauh na nei ta a ni. Election Commissioner dang Anup Chandra Pandey chu February thla khan a lo retired tawh bawk.
Goel hi retired bureaucrat niin 1985-batch IAS officer Punjab cadre a ni a. November 21, 2022 han Election Commission a zawm a ni.
A ban hun chu Election Commission tana hun pawimawh tawp khawk niin Lok Sabha inthlan hun puan dawn ruai lai a ni a. Commission chuan State leh Union Territory tin te chu inthlan inpuahchah nan an tlawh vek tawh a, March 11 atanga March 13 hian Jammu and Kashmir tlawh tur an ni bawk.
Arun Goel ban hnu ni hnih lekah Supreme Court chuan electoral bonds issue a ngaihtuah dawn bawk a ni.
Goel ban chungchangah Congress party te chuan ‘khawvela democracy ram lian ber ten ngaihvenawm tak zet’ tiin an sawi a.
“Constitutional institution ECI ang te kal danah engmah langtlang reng a awm lo va, sorkar duh dan ang angin an kal tawp mai a ni” tiin Congress general secretary organisation K.C. Venugopal chuan a sawi.
PIL petition
A hmain Association for Democratic Reforms (ADR), NGO te chuan Goel a Election Commission atana ruat a nih laiin Supreme Court ah dan kalha ruat a ni tiin public interest litigation (PIL) petition an lo thehluh khum tawh a.
Mahse Apex court chuan inrawlh duh lovin Constitution Bench chuan a kalphung te a enfel tawh tia sawiin a kalpui thui duh lo thung.
Goel ban hnuah ADR chairman Trilochan Shastry chuan “A bang hi kan lawm a ni” tiin a sawi thung.
Election Commissiona hnaruak awm mek te chu nikum December thlaa dan thar siam Chief Election Commissioner and other Other Election Commissioners (Appointment, Conditions of Service and Term of Office) Act, 2023 hmangin hnawhkhah a ngai dawn a ni.
Act chuan Prime Minister kaihhruai selection committee din tur a ti a, chutah chuan Lok Sabha a Leader of Opposition leh PM ruat Union Minister te chu commission member an ni ang.
March 2023 khan Supreme Court cdhuan selection panel ah chuan Prime Minister, Leader of Opposition, Lok Sabha leh Chief Justice of India te an tewl ang a ti a, court chuan Parliament in dan a siam thar hma chuan chutianga kal tur a lo ti tawh bawk.
SC ruling hma zawng chuan Election Commissioners leh Chief Election Commissioners (CECs) te chu sorkar rawtna angin President in a ruat thin a ni.
Election Commissioner bang hnuhnung ber chu Ashok Lavasa niin kum 2020 khan Philippines-based Asian Development Bank (ADB) a zawm duh avangin a bang a ni.
Punjab cadre IAS officer Goel hi kum 37 a service hnuah Secretary, Ministry of Heavy Industry niin a pension a ni.
Kum 1962 khan Patiala, Punjab a piang niin Churchill College, Unioversity of Cambridge, England atanga development economics postgraduate a ni a, Jof F. Kennedy School of Government, Harvard University, US atanga training chhuak a ni bawk.
Secretary, Ministry of Culture; Vice-Chairman, Delhi Development Authority; Additional Secretary and Financial Adviser, Ministry of Labour and Employment; leh Joint Secretary, Department of Revenue, Ministry of Finance hnate lo chelh tawh tu a ni.