Mizoram inthlanpui lo awm tur chungchanga Election Commission of India atanga lokal, senior election commissioner Dharmendra Sharma leh a team-te chuan Zirtawpni khan chief secretary, director general of police leh department hrang hranga secretary-te thutkhawm puiin inthlan felfai tak neih a nih theihna’n thil tulte an sawipui.
Chief secretary Renu Sharma chuan inthlanpui felfai tak neih a nih theihna’n state sawrkarin hma a la mek tih sawiin, ECI duhdan ang ngeia inthlan kalpui a nih tur thu a sawi. ECI official-te chuan a hun takah Mizoram an rawn tlawh a ni tiin, inthlanpui awm turah ECI duhdan leh ngaihpawimawhte tihlawhtling turin chak takin sawrkarin kut a thlak zel dawn tih a lo hrilh. Mizoram chu India rama state ralmuang ber a ni, tiin, inthlan felfai tak neih a lo ni fo tawh thin a, kumin inthlanpui pawh fel leh ralmuang taka neih a nih leh ngei a beisei thu a sawi a ni.
Senior EC Dharmendra Sharma chuan ECI-in a duh ber chu inthlan felfai leh thianghlim tak neih a ni a, polling station ralmuang taka siam leh tui thianghlim in tur leh inthiarna tha tak neih bakah rualbanlote tan wheelchair hmanga awlsam taka vote an thlak theihna’na ‘ramp’ dah te, Covid vaccine vawihnih la chauh duty tir, inthlanpui laia zu leh ruihhlo hluar thin tihbo bakah sum sem thin tihrem a ngaih thu a sawi. Social media hmansualna tam tak, a bikin dawt hmanga inbeihna leh thudik lo thehdarh thinte manchhuah leh hremte, election official-te zin veihvahna atana felfai taka ruahmanna siamte a ni tih a sawi bawk. Heng zawng zawng tihhlawhtlin a nih theihna’n sawrkar department secretary-te chu hma la tura a duh thu a sawi rualin, harsatna an neih chuan inthlahrung loa ECI hnena hriattir turin a chah.
ECI hotute hian Zirtawpni vek khan inthlanpui atana sawrkar laipui hnuaia agency-te inbuatsaihna hrang hrang an enpui bawk a. Heng thutkhawm pahnihah hian Mizoram chief electoral officer Madhup Vyas chuan inhmelhriat tirna hmangin, lawmthu a sawi a ni.
ECI hotute leh sawrkar hotute inkawm
![](https://theaizawlpost.org/wp-content/uploads/tap_logo-min-large.jpg)