Chief election commissioner (CEC) Rajiv Kumar kaihhruai Election Commission Team chuan Mizorama MLA inthlanpui neih tura inbuatsaihnaah inpuahchahna an endik chhunzawm zel.
Nilaini khan district 11-a district election officer leh superintendent of police-te kawmin, an hmalak dan an ngaithla a. Election Comission Team chuan district official-te chu tun aia vote thlak an tam zawk theih nan tan la tur te, a hmei a pa, thalai leh khawpuia chengten vote an thlak uar lehzual nan SVEEP campaign leh district mila hma lak ngaih bikna laiah tan la turin a chah.
Electoral roll dik leh felfai zawk neih a nih theih nan tuna kalpui mek 2nd Special Summary Revision chu uluk lehzuala nei turin a chah bakah state sawrkara thuneitu chief secretary leh director general of police-te, sawrkar secretary rualte hmu in, inthlanna atana inpuahchahna an sawipui a ni.
Hemi hnu hian chief electoral officer, state police nodal officer leh CAPF nodal officer-te an kawm leh a; inthlan tura inpuahchahna tlangpui leh thlen tawh chin an zawt a, venhim hna thawktu tur leh ruahmanna siamte an zirchiang a ni.
Vawiin, August 31 hian Assembly House Annex-a SVEEP Exibition buatsaih tlawh an tum bakah state icons, PwD voters leh thalai vote neite an kawm ang.
ECI hotuten state official kawm
