October 3 atangin Election Commission of India official-te chuan Telangana chu ni thum chamin an tlawh dawn a.
EC team-ah hian senior official-te tel dawnin Telangana inthlan tur inpuahchahna mai bakah local community te nena inkawmhona te pawh an nei dawn a ni. Hei hi Telangana in inthlan a hmachhawn hmaa ECI team tena thlithlai lawkna an neih hmasakna pawimawh anga ngaih a ni.
Kum 2018 khan Assembly poll chu October 6 ah puan niin November 12 ah notification tihchhuah a ni a, December 11 ah inthlanna neih a ni a. Tuna Assembly hi January 17 a tawp tur a ni.
“Team ten inthlan kaihhnawih thil tin an enfiah ang a. Hna pawimawh chinfel hun tur te bitukin thil pawimawh leh tul te an enfiah vek ang” tiin ECI senior official chuan a sawi a. Chief Electoral Officer chuan tun hnai karah inthlanna felfai tak neih a nih theih nana ruahmanna siama an hmanhlel tawh thu a sawi bawk.
Chief Electoral Officer’s office chuan national leh Telangana a party tin aiawh te bakah enforcement agencies te nen Assembly inthlan kaihhnawih thilah inkawmhona an nei tawh tiin a sawi bawk.
Tun tumah hi chuan inthlanna buatsaih a nih theih nana grassroot level-a chinfel ngai te district election officer, superintendent/commissioner of police te nena sawihona neih a ni ang tiin a sawi bawk.
Telangana hi kumina India state inthlang tur zinga pakhat a ni a. Rajasthan, Chhattisgarh, Madhya Pradesh, Telangana leh Karnataka bakah Mizoram pawhin inthlan a hmachhawn dawn a ni.
ECI ten Telangana State tlawh dawn
