Election Commission of India secretary Binod Kumar hoin Thawhlehni khan Aizawl district-a inthlan leh electoral roll lama mawhphurtute an thukhawm a. Special Intensive Revision (SIR) 2026 kalpuina tura hmalakna an thlirho.
SIR kalpui tura an inpuahchahna leh hma an lo lak tawh chin hriat bakah an hriatchian loh lai leh harsatna an neihte ngaithla a, a ngaihpawimawh zawng thurawn pe tura lokal a ni tih ECI secretary hian a sawi a. Electoral roll felfai leh thianghlim neihna atan SIR 2026 hi kalpui a ni, tiin, ram pum nghawng pha thil a nih avangin a buaipuituten taima leh felfai taka an buaipui chu ECI-in a beisei tih a sawi a ni.
Thutkhawmah hian Aizawl district election officer Er Lalhriatpuia’n SIR kalpui tura an district inpuahchahna leh hma lo lak tawh chin powerpoint presentation hmangin a sawifiah.
Aizawl district-ah hian Assembly constituency 12, polling station 324 a awm a. Rationalization hnuah chuan P/S 359 awm tura beisei a ni. Voter 292635 awmin, mipa voter 136654 leh hmeichhe voters 155981 an awm a. Kum 2005 electoral roll-a voter awm zat chu 133658 a ni. Electors mapped tawh 218623 niin, chu chu zaa 74.71 a ni. Enumeration form 585270 print a ni tawh bawk.
ECO hotu hian Thawhlehni vek khan Govt. Middle School Zemabawk West Polling Station a tlawh nghal a ni.
ECO hotu hoin SIR inbuatsaihna thlirlet
