Economics & Statistics department chuan an kum 50-na tlin, Golden Jubilee an lawm mek a, a lawmna pui ber hi Thawhlehni khan hmangin, chief secretary Dr Renu Sharma chuan a hmanpui.
Chief secretary chuan statistics leh a kaihhnawih zawng zawngah nodal agency an nih avangin tan la zel turin thawktute a fuih a. Department-in theme-a an hman “One State One Statistics’ chu a pawimawh hle, tiin, state-in data dik kan neih zel theih nan a hun tak, rintlak, dik bawk si kan neih theih nan thawktute bakah sawrkar department dang zawng zawng, tlawmngai pawl leh pawl dangte statistics tha kan neih theih nan tan la theuh turin a sawm tih a sawi.
“Statistics tha chuan hmasawn nana ruahmanna atan leh hmalam atana policy siam nante a pui nasa a, data tha leh dik telloin hmasawnna hian kawng dik a zawh mumal thei lo hial ang,” a ti.
Chief secretary hian jubilee hriatrengna lungphun a hawn bakah photo gallery-a thlalak hlui leh, office khawl hman thin thenkhat tarlante a tlawh a. Statistical Handbook Mizoram 2022 leh Meteorological Data of Mizoram 2022 chu a tlangzarh bawk.
Economics & Statistics hian 1973 March 1-ah office hran, enkawltu hran a nei tan a. State official statistics leh data vawngtu a ni. 2008 August 19 atangin state chhunga statistics leh a kaihhnawih hna reng rengah nodal agency atan state sawrkar chuan a puang a ni.
Eco & Stats-in kum 50-na lawm
