Kum engemawzat Argentina ram economic dinhmun tha thei lo leh thil man sang uchuak reng mai lak atanga chhanchhuak theitu tur zawngin Argentina chuan nimin Sunday khan President thlangin vote an thlak.
Argentina ram economic dinhmun chhe tak atanga chhanchhuak tur hian politician pawh ni ngai lo Javier Milei chu President chuhtu langsar ber te zingah a awm a ni.
Khawvela ram leilung hausakna nei tha ber te zing ami ni siin Argentina hian kum sawm engemawzat chu hmasawn belh thei loin a awm a, sum leh pai dinhmunah harsatna lian tak a tawk reng a, sum leh pai enkawlna kawngah a hlawhchhamin ram chhungah thil man a to em em reng mai a, kum tin mai hian za zela 140 laiin a pung thin a ni.
Argentina mipui za zela 40 te chu mirethei an niin middle class te innghahna an ni a, voters tamtak te chu party upa tawh takte innghahna leh rinchhan niin heng party hlui te hi an retheih chhan an ni lawi si a ni.
University zirlai Valentin Figarra chuan, “Engmah hi hriat chian theih a ni lo – I in luah man a sang emaw bazar-a thil man a sang emaw i hre ngai lo ang. Hei hi rilru atna a ni. Miin hmasawn zel a duh ang, mahse he generation-ah hi chuan chu chu thil theih a ni lo,” tiin a sawi a ni.
Political Science zirlai Agustin Baletti, 22, chuan Milei a vote tur thu sawiin sorkar kal tawh te khan beiseina thar nei turin engmah min hnutchhiah lo tiin a sawi a ni. Engkim mai hi tunah hian a keh darh a, Milei hi engkim ti keh darhtu a ni lo em ni, tiin Milei tantute chuan an sawi a ni.
Opinion polls-ah chuan Milei hian mipui rin a hlawh ber a, mahse hun kal tawh thlir chuan he opinion polls hi a rintlak ngai lo a, analysts te sawi dan chuan candidate panga te zinga mi pathum atangin engmah chiang a la awm theih loh thu an sawi ve mek bawk a ni.
Argentina Economic Minister ni lai mek Sergio Massa chu ruling leh an thawhpui Peronist te innghahna niin kum engemaw zat Argentina politics-ah dinhmun pawimawh a lo chelh tawh thin a, mahse tunah chuan a dunhmun a tla hniamin mi hriat hlawh a ni tawh lo a ni.
Argentina ram economic tluk chhiat chhan sawi chuan Massa chu a khingpuite tana puhmawh tur tha tak a ni ringawt mai a ni.
Economic dinhmun chhia Argentina inthlang
