Economic policy mila zirna kalpui
a ngai – Vanlalruata
Mizoramah hma sawn kan tum chuan economic policy mila zirna kan kalpui a ngai a, chu chu an party tum dan pawh a ni tih PC president Vanlalruata chuan a sawi.
An party street campaign neiha an booklet sem tur zirhonaa Ningania an neihah PC president chuan Mizorama zirna kan kalpui dan chu siamthat a, hma sawn kan tum dan chu state economic policy mila zirna her a ngai, tiin, “Mizoramah hian zirna kan kalpui reng, sawrkarin sum pawh a seng nasa. Amaherawhchu, zirna kan kalpui dan leh kan economic policy a inpersan daih a, chuvang chuan school atanga thiamna kan puakchhuah pawh kan economy nen a inmil ta loa, chu vang chuan lehkhathiam hna nei lo kan tih hi kan awm ta teuh mai a ni,” a ti.
Kan economic policy-in a mamawh thiamna kan zirchhuah a ngai a, zirchhuakten an zirchhuah an hman tangkai theihna turin economic policy nen a inmil a ngai tih Vanlalruata hian a sawi a. Hemi zawnga kan inherrem theih chuan lehkhathiam hna nei lo kan tih ang chi chu a bo tawh dawn tih a sawi a ni.
“Education Reform kan sawi thin. Chu education reform chu kan ram mil a, kan ram thiamna mamawh mil zawnga zirna kan kalpui a, kan rama hna awm thawk thei tura kan inchher a, hna lo piang thar tur mila kan inher zel a ngai a. Hei hi kan party chuan kan sawi dan a ni a, kan tum dan a ni, ” PC hruaitu hian a ti.
Economic policy mila zirna kalpui a ngai – Vanlalruata
