Ecuador chuan Spanish police-te nena tanghova beihpui an thlaknaah an rama ruihhlo tawlhtu pawl lian ber, Los Lobos-a an hotu ber an man tih President Daniel Noboa-a’n Pathianni khan a sawi.
‘Pipo’ tia an sawi, Wilmer Geovanny Chavarria Barre-a hi pawl chak leh tharum thawh nasat tak a ho va, September thla khan an pawl hi US chuan ‘foreign terrorist organization’-ah an elpui, Los Choneros en a puang nghe nghe.
Noboa-a chuan Chavarria-a hian dan lova thil laih chhuahna khur pawh a kalpui nasa a, Mexico-a Jalisco New Generation Cartel nen ruihhlo tawlhna kawng pawh an sial dun a, a thi tia inthantirin a nihna a thlak a, inthupin Europe-ah a biru a, Ecuador-a mi thahna thupek a chhuah reng thung niin a sawi.
“Mi thenkhat chuan a thi niin an ngai a, keini hian kan la zawng ngar ngar a ni,” tiin Noboa hian social media-ah a tar lang a. Spanish police-in an thawhpuinaah lawm thu a sawi bawk a. Ecuador-a police chief chuan Malaga-a man niin a sawi bawk.
Interior Minister John Reimberg-a chuan Chavarria-a hi mi 400 vel thihnaah mawhphurtu niin social media-ah vek a tar lang a, kum 2011 leh 2019 inkara lung in a tan lai pawhin tan in atangin pawikhawihna tur thupek a la pe reng niin a sawi.
Latin America-a ram him ber ni thin, Ecuador hi tharum thawhna, a bikin mi sual pawl chetna a tam tam em avanginNoboa hian tihreh tumin a bei nasa a. Mi thiamte chuan mi sual pawl hotu lian man hian tharum thawhna leh inthahna bakah pawl inkara thuneihna inchuhna a nasa sawt zel thin niin an sawi thung.
Ecuadorean-te hian Pathianni khan an rama ram dang sipai awmtir leh duh leh duh lohvah ngaihdan lak nan vote an thlak chiah a. Noboa-a chuan ram dang sipai puihna nena mi sual pawl beih hi tul niin a ngai a ni.
Ecuador-a ruihhlo tawlhtu pawl lian ber hotu man
