Ecuador defender Pineida an kaphlum
An ram club Barcelona SC tana kum kua khel tling Ecuador defender Mario Pineida chu Guayaquil khawpuiah kahhlum a ni.
Tualchhung media-te tarlan danin, kum 33 mi hi motorbike-a inphur mi pahnihin dawr kawtah an kap a, amah bakah hian a nu leh dawr kawta awm ve nu pakhat an kap tel bawk.
Ecuador interior ministry thuchhuah chuan he inkahna chhui tur hian special police unit din a nih thu an tarlang.
Ecuador hmar lam khawpui Guayaquil hi gang rualin tharum an thawh nasatna hmun niin, tharum thawhna bakah ruihhloa sumdawnna hmun lar tak a ni tel a; an chhinchhiah danin kumin January thla atanga September thla chhung khan he khawpuiah ringawt hian mi 1,900 zet thah an ni a, hei hi Ecuador rama inthahna rate sang ber a la ni.
Infiammite pawh tharum thawhna tuartu zingah telin, September thla mai khan second-tier footballer pathum thah an ni a, October thlaa inkahnaah tualchhung player pakhat a hliam leh bawk.
Footballer nunna chan tharlam ber ni rih Pineida hian kum 2014 leh 2021 chhung khan Ecuador tan game kua a khel tling.
Kum 2016-a Guayaquil khaw club Barcelona SC lama a insawn hmain Pineida hian Independiente DV-ah a club career bul tanin, Fluminese leh El Nacional lamah loan-in a khel tawh bawk.
Ecuador defender Pineida an kaphlum
