Supreme Court chuan Nilaini khan Centre-in ngenna a siama Enforcement Directorate (ED) Director Sanjay Kumar Mishra chu October 15 thlenga a hna chelhtir tura ngenna a siam chu ngaihtuah ran a remti.
Supreme Court chuan July 11 khan Sanjay Kumar Mishra hi a hna atanga chawl tawh turin a lo ti tawh a. Top court chuan khatihlai khan Mishra an ED chief a nihna tum thum lai pawhseia November 2023 thlenga chelhtir tumna chu dan kalh tiin a lo sawi tawh a.
Mahse, July 11 khan sorkar chu Mishra thlaktu tur ruat nan July 31 thleng hun a pe a. Hetia hun a pekna chhan hi sorkar laipuiin Financial Action Task Force (FATF) kalpui mekah Mishra chu mamawh ngawih ngawih a ni tia a ngen vang a ni.
Nilaini khan Justice B.R. Gavai kaihhruai Bench in a ngaihtuahnaah Solicitor General Tushar Mehta Centre aiawha ding chuan Mishra tenure chu July 31 atanga October thla laihawl 2023 thlenga pawhsei a ngen a.
Phek 12 laia chhah application a thehluhah “Union of Unia chuan lohtheihlohin FATF review kalpui mek pawimawh lai a nih avangin Mishra chu October 15, 2023 thleng a hna chelh turin a ngen a ni,” tiin tarlan a ni a.
Anti-money laundering regime India rama kalpui mek chu July 21 khan tha zawka kalpui a nih theihna tur thehluh tawh niin FATF assessment team te chuan November thla thleng site-visit an neih ngai a ni an ti bawk a.
“Hun pawimawh lai ber a nih avangin, he thila mi pawimawh leh hre ber ram pum huapa money laundering investigation dinhmun leh kaloui dan hrechiang ber chuan ED hi a la thutchilh rih a ngai a ni,” tiin Centre chuan ngenna a siamah a tarlang.
Centre chuan ED hotu lawk ber nihna chu tun dinhmunah Mishra chuan a chelh ngei ngei a ngai a, assessment team te report, information, statistics etc ah mamawh a ni, a ti bawk a.
“Tun dinhmuna ED a inthlak danglam a awm a nih chuan assessment team te thawhpuina kawngah bahlahna awm thei a ni a, chu chuan India national interest a khawih dawn a ni” tiin Centre chuan ngenna an siamah an tarlang bawk.
Nilaini-ah Solicitor General Tushar Mehta chuan court in Mishra hun a pawhsei ngei theih nan ngenna thar an thehluh thu a sawi a. Mishra hian ED Director hna a kum nga na a chelh mek a ni.
July 11 khan Supreme Court thung chuan kum 2021 a Central Vigilance Commission Act, Delhi Special Police Establishment Act leh Fundamental Rules hmanga CBI leh ED chief te kum hnih fixed tenure bakah tum thum pawhsei bak theihloh tih chu a kengkawh tlang thung a.
September 2021 han Supreme Court chuan sorkar chu Mishra hnathawh pawhsei sak lo turin a lo ti tawh a. Mahse, amendment siam zui niin he mi hmang hian sorkar chuan court thupek kalkanin Mishra chu tum hnih a hna chelh turin a pawhsei sak zui tawh a ni.
ED director hun pawhsei belh Centre in tum lui zui zel
