Education minister-in sikul pali leh taxation DCC tlawh
Nimin khan school education minister Dr. Vanlalthlana chuan Vairengte-a school pali leh Taxation Data Collection Centre a tlawh.
Minister hian Govt. Vairengte PS-VII, Govt. Vairengte High School, St Henry School leh Govt. Vairengte Higher Secondary School te a tlawh a. Heng school a tlawhnaah hian thawktuten Minister hnenah hian an mamawh leh indaihlohna te an lo thlen nghal a ni.
Vairengte-a Taxation Data Collection Centre a tlawhnaah Dr. Vanlalthlana chuan an harsatna neihte a hmun ngeia enfiahpui leh an hmunhmate a hmuna tlawh tura kal a nih thu a sawi a. Tax luh that tawk loh chhan zinga langsar zualte tarlangin, “Tax pumpelhna chi hrang hrang – Vairam atanga thil lei, Mizorama rawn hralh leh si, amaherawhchu vairama tax pe si te, Mizorama thil hralh, Mizorama hralh ang ni lova ziah te leh tax pumpelhna kawng tam tak a awm thin a ni,” a ti a. Hemi piah lamah hian, engtiangin nge tun aia chak zawk leh tam zawka tax collection tihpun a nih theih ang tih chu a ngaih pawimawh a nih thu a sawi bawk.
Minister hian Vairengte a pan hma hian Kolasib-a Deputy Commissioner of State Tax, Kolasib Zone Office chu a tlawh hmasa a. Heta thawktute chu fuihin, theihtawp an chhuah tlan chuan tax revenue tun aia tam an hmuh theih ngei a beisei thu a sawi. Taxation office-a thawktute hian Kolasib Zone-a an hmalakna hrang hrangte minister hi an lo hrilh a, Kolasib hnaiha Tax inspection point awm thei se an duh thu leh an mamawh dangte an thlen.
Education minister-in sikul pali leh taxation DCC tlawh
