Egyptian pachak, wrestler Ashraf Mahrous chu a chak em avanga a hming lemah pawh ‘Kabonga’ an tihhial a ni a, Egypt-a Red Sea resort Hurghada-ah lawng lian pahnih a thlunna hrui a ha a sehin a hnuk tawlh thei tlat! A lawng hnuh tawlh pahnih rihzawng belhkhawm hi ton 1,150 (kg 10,43,200 vel) a rit a ni.
Ashraf, kum 44, hian a tirah chuan lawng ton 700 (kg 6,35,000 vel) a rit hnuk tawlhin record a siam hmasa phawt a, chumi hnuah a rualin lawng pahnih a hnuk tawlh leh a, a lawng pahnih hnuh tawlh rih zawng belhkhawm chu ton 1,150 a tling ta a ni.
Ashraf Mahrous chuan, “Vawiin hian world record siam tumin ka thawk chhuak a. An pahnihin ka hnuk tawlh a, Pathian chu fakin awm raw se, Pathianin khawvela pachak berah min siam tih ka thiante leh khawvel mit hmuhah ka pholang ta a ni,” a ti.
Ismalia a cheng, he wrestler hian a lawng hnuk tawlh lai video te chu Guinness World Record lamah an lo endik tura thawnin, record siam dilna a theh lut dawn tih a sawi a, tuna Guinness World Record-in ha a lawng hnuk rit bera a puan lai chuan ton 614 (kg 5,57,000 vel) a rit, 2018 khan a hnuk tawlh a ni.
Mahrous hian rel (train) ton 279 (kg 2,53,105) a rit pawh a thlunna hrui sehin, meter 10 dawn a thui a lo hnuk tawlh tawh a, hei hi Guinness World Record-in khawvela rel hnuk tawlh rit thei berah a lo puang tawh a, hei bakah hian rel meter 100 a thui hnuk tawlh rit thei ber record a siam tawh bawk. Hei bakah hian tun hma deuhin truck leh a thil phurh kg 15,730 a rit chu a hain a lo hnuk tawlh tawh bawk.
Mahrous hi feet 6 leh inches 3 a sang niin, kg 155 a rit a ni a, mipa naupang kum 9 mi vel a nih lai atangin a chakna hi sum hmuh nan a lo hmang tangkai tan tawh a, thil rit tak tak chawiin pawisa a hlawh thin. Hetiang khawpa pachak chuan ei leh in pawh a tithei ham ham hle a, record siam tuma a inpuahchah lai phei chuan nitin protein leh iron tamna chaw eiin, artui a dozen a a ei bakah ar pum hnih leh sangha kg 5 te nikhatah a ei thin.
Egyptian pachakin a hain lawng hnuk tawlh
