Ei leh in endikna lama thuneitu health department hnuaia Food & Drugs Administration chuan tun hnaiah Aizawl khawpuia ei leh in siamna dawr 100 chuang tlawhin an endik a, a tam zawk chu an choka a thianghlim tawk lo tih an hmuchhuak.
FDA hian dawr 112 an endik a, heng zinga 80% vel chu eitur siam dan thianghlim tawk lo tih a ni a, eitur siamna hmanrua an hman zingah expire tawh kawl te pawh an awm a, phalna nei lova ei leh in siamna dawr hawng mi 30 zet an awm bawk. Ei leh in siam zirchhuak chhawr an tam lo a, eitur an sawngbawl kawngah an che pawlawh hle a, eitur uluk taka dahthat loh a awm a, tho leh rannung dangina lo bawm tawk te pawh an hmu.
Thil mak tak pakhat chu, rating an pek excellent hmute zingah Aizawla hotel leh restaurant lian leh larte an tel pha lo hi a ni. Ei leh in sawngbawlna hi vantlang hmuh phak loh a ni a, mahse a khualchhawng lam, customer-te hmuh theih chinah erawh thianghlimna an vawng uluk ve leh hle lawi si niin a lang.
Tunhma kum 15 vel liam ta atang khan FDA lam hian Aizawl khawpui chhunga thingpui dawr, restaurant leh hotel endik hna hi a lo thawk tawh thin a, new market chhunga thingpui dawr hrang hrangte pawh an fel fai phah hle a, restaurant leh hotel te pawhin hma an sawn phah hle bawk. Mahse, hun a lo kal leh deuh a, FDA lamin thawm an han chhuah lo deuh a, ei leh in sawngbawl leh thianghlimna kawngah kan lo hniam leh hle hman niin a ngaih theih. Chu mi awmzia chu, mahni chhia leh tha hriatna hmanga thil dik leh tha zawm tum aiin, miin an hmuh loh avang leh, endikna a awm loh avanga inthlahdah leh ta mai kan pawiti lo tihna a ni.
Ei leh in sawngbawl kawnga thianghlimna kan vawn that loh vang hi em ni ang, natna benvawn vei kan tam chhan hi tihte pawh ngaihtuah tham tak a ni awm e.
Ei leh in sawngbawlna dawr bakah hian, eitur zuartu dawr hrang hrangte pawh hi endik a ngai hle niin a lang. Mi tam tak chu, eitur package an lei dawnin a expiry date en lem lova lei mai hi an tam a, hei hi remchangah lain, eitur expired tawh hi dawr thenkhatah hi chuan hmuh tur a awm zut thin bawk. ‘Hei chu a expire a nih hi’ han tih hian, ‘kan lo dahchhuah theihnghilh palh a nih hi’ an ti liam mai thin. Hengte pawh hi FDA lam hian hma tel thei se duhawm hle a. Tunhmaa an hma tel thin, khawchhak atanga eitur lo lut, expiry date pawh hriat theih loh ang chi ho pawh hi hma tel a that a rinawm hle.
FDA lam hian beihpui han thlak chho leh se, mipui lam pawhin an tha tichak turin theihtawpin tawiawm ila, chu chu kan that tlanna tur vek a ni.
Ei leh in sawngbawl
