Brigade Field mawng lama vawk vulh duh intelkhawm hnenah sawrkarin ram a hawhtir dawn.
Bawngkawn Brigade Pig Producers Cooperative Society-in eizawnna tura ram an bawh mek Brigade Field mawnglam ami chu Inrinni khan Land Revenue & Settlement minister B Lalchhanzova chuan a tlawh a. Society member-te nen hma lak dan tur an sawi ho. Helai ram hi land lease pe in kalpui tum a ni a, Municipal dan siam bawhchhe lo thei ang bera kalpui tum a ni.
Aizawl khawpuia cheng mi tam takin eizawnna kalpui turin ram an nei vek loa; ran vulh, huan siam, puantah leh a dangte kalpui turin ram awl hman tur a vang hle, tiin Revenue minister hian a sawi a. He harsatna sukiang tur hian Urban Livelihood Multipurpose Camp (ULMIC) tih an department chuan ruahman tumin a ngaituah tih a sawi.
“Aizawl khawpuia cheng eizawnna tur ram nei si loten an mamawh dan anga an hman hawh theih tur ram awl la awmte zawn a ni anga, ram awl nei midangte eizawnna atana hawhtir phal pawh thawhpuia sawm an ni ang. ULMIC hmun chu sawrkarin convergence hmangin kawng, electric, tui leh tul dang a ruahman anga, eizawnna mamawhten inhnangfak nan tangkai takin an hmang thei dawn a ni,” a ti.
ULMIC hi mimal ta tur niloin, Zau tinah society din a ni anga, eizawnna mamawhten an hmang tangkai thei dawn tih B Lalchhanzova hian a sawi.
Hetiang din tur hian department mal anga kalpui theih a ni dawn loa, department hrang hrang, municipal, local council, kohhran, YMA leh a dangte thawhhona tur a ni dawn a. Ei zawng duhten awlsam zawka an eizawnna an kalpui theihnan Zau tin mamawhte sawrkar chuan a theih anga angin a ngaihtuahpui dawn tih a sawi bawk.
“Ruihhloa harsatna tawkte tan nun kawng dik zawhna atan pawh a tangkai theih a beiseiawm hle,” a ti.
Ei zawng duh si ram neilo intelkhawm tan ram hawhtir
