Kawng chhiain kawng hrang hrangin mipui a nghawng a, eirawngbawlna gas pawh tun hnaiah a thleng tha lo.
Aizawl veng thenkhatin gas an hmu tha lo a, tun hnaiah black market-a lei pawh an pung nia hriat a ni.
Local Council lamin mipuite hriattirna an chhuah te pawh a awm a, mipui atanga zawhna an dawn nasat vang a nih thu an sawi. “Tunlai hian eirawngbawlna gas a thlen that loh avangin mipuite’n harsatna kan tawk deuh a, hei hi a chhan ber chu kawng chhiat/that loh vang a ni. Veng chhung mipuite gas harsat chhan kan inhriattir a, kan hrethiam hram hram dawn nia,” tiin Local Council pakhat chuan hriattirna an chhuah.
Gas agency te’n kawng a chhiat avangin eirawngbawlna gas a thleng tha lo tih an sawi a, thla hmasa atang khan a thleng tha lo tawh tih an sawi.
Tunlaiin gas phurte an thang rei a, Vairengte atangin ni thum ni li-ah Aizawl an thleng thei an ti a, chu pawh an tlang that pangngai chuan tiin an sawi. Kawng siam a nih avangin kawng hi khar a nih chang a awm a, kawng an khar phei chuan chu aia rei chu an thangthin an ti.
Aizawl atanga chhuakte pawh kawngah an thang rei tih an sawi a, kar hmasa phei kha chuan kawng siam vanga kawng khar hi a awm nual a, hei hian a nghawng tih an sawi.
Tunlai hi puja hun lai a ni a, puja vang hian phai lam an lo chawl ve bawk. Hei vang hian gas hi a thleng tha lo zual tih thu dawn a ni.
Chutih rual chuan agency te chuan puja dawnah an lo inlakhawl (stock) thei lo tih an sawi a, thla hmasa atangin kawng chhiain gas phurh a nghawng tawh avangin inlakkhawl ngaihna a awm lo tih an sawi.
Puja a zo ang a, kawng a zia chuan gas hi a thlen that leh mai an beisei thu agency te chuan an sawi.
Eirawngbawlna gas lamah harsatna
